«Иоланта» операҕа оҕо, ыччат дьон тоҕуоруста

Алтынньы 17-31 күннэригэр Дьокуускайга «Чайковский-фест. Якутск» опера-балет бэстибээлэ буола турар. Бу Арассыыйатааҕы бэстибээл улуу композитор Петр Чайковскай төрөөбүтэ 185 сылыгар ананар, Бэрэсидьиэн култуура көҕүлээһиннэрин пуондатын өйөбүлүнэн ыытыллар.

Бу бэстибээлгэ Санкт-Петербурдааҕы Мариинскай тыйаатыр, Москватааҕы Улахан тыйаатыр, Башкирскай опера, балет тыйаатырын солистара, дирижер Алексей Асланов, пианист Анатолий Кузнецов  кытталлар. Суорун Омоллоон аатынан Опера, балет тыйаатырын артыыстарын кытта улуу композитор «Щелкунчик», «Иоланта», «Лебединое озеро», «Евгений Онегин» курдук аатырбыт операларын, балеттарын Дьокуускай көрөөччүтүгэр  көрдөрөллөр.

Алтынньы 23 күнүгэр «Иоланта» опера буолла. Бу Генрик Герц «Дочь короля Рене» драматынан суруллубут опера. Рене хоруол кыыһа Иоланта төрүөҕүттэн көрбөт эбит. Ийэлээх аҕата кинини харыстаан, дьон бары көрбөт диэн ииппиттэр, күн сырдыгын көрөр диэн хайдаҕын кистэлэҥҥэ туппуттар. Кэрэчээн принцесса көрөр буолуо дуо? Биллэн турар, манна таптал күүһэ көмөлөөх буолуоҕа.

Иоланта оруолун СӨ култууратын туйгуна, Италияҕа буолбут Норуоттар икки ардыларынааҕы бэстибээл бириэмийэтин хаһаайката,  Екатерина Захарова, Рене хоруол оруолун Мариинскай тыйаатыр солиһа, Чайковскай аатынан норуоттар икки ардыларынааҕы куонкурус лауреата Глеб Перязев толороллор. Мариинскай тыйаатыр дирижера, Улахан тыйаатыр ыҥырыылаах дирижера, С.Рахманинов аатынан норуоттар икки ардыларынааҕы пианистар, композитордар, дирижердар куонкурустарын лауреата Алексей Асланов кэлэн, дирижердаата. Кини бу «Иолантаҕа» аан бастаан үлэлээтэ.

Саала иһэ толору. Тыйаатырга элбэх оҕо, ыччат баарын бэлиэтии көрдүм. Арааһа, «Пушкинскай каартаны» туһанан, кылааһынан култуураҕа сыста, кэрэни кэрэхсии кэлбиттэр. Операны айдаарбакка, чуумпуран олорон истибиттэрин хайгыы санаатым.