Ипотека эрэгийиэннэринэн араастаһыан сөп

Чугастааҕы кэмҥэ ипотека кирэдьиитин бырыһыаннаах ыстаапката араастаһыан сөп. Кирэдьиит таһыма эрэгийиэҥҥэ орто хамнастан тутулуктаах буолуоҕа. Бу туһунан Судаарыстыбаннай Дума бэрэссэдээтэлэ Вячеслав Володин «Парламентская газета» иһитиннэрдэ

Бу иннинэ от ыйын 16 күнүгэр Судаарыстыбаннай Думаҕа «бырабыыталыстыба чааһыгар» Вячеслав Володин бырабыыталыстыба бэрэстэбиитэллэригэр эрэгийиэннэргэ хамнас таһымыттан көрөн, ипотека ыстаапкатын араастаан олохтуурга этии киллэрбитэ. Кини санаатынан, өссө биир мэктиэнэн дьиэ кэргэҥҥэ оҕо ахсаана буолуохтаах.

«Биһиэхэ ипотека кирэдьиитин ыстаапката бары эрэгийиэннэринэн биир тэҥ. Дохуоттары учуоттаабат. Киһи ханна олороруттан тутулуга суох: Костромаҕа, Москваҕа – ипотека кирэдьиитин ыстаапката биир тэҥ. Оттон хамнас? Оттон дохуот?» — диэн Вячеслав Володин пленарнай мунньах саалатыгар баар миниистирдэргэ иһитиннэрбитэ.

«Ол эрээри Арассыыйа сайдарын туһугар эрэгийиэннэргэ сөптөөх усулуобуйаны тэрийиэхпитин наада уонна ипотека ыстаапката араастаһарын курдук этии киллэриэххэ наада: Костромаҕа – биир, Москваҕа – атын, Краснодарга – үһүс, Тываҕа – төрдүс, ол иһигэр кыра куораттарга эмиэ. Уонна, биллэн турар, оҕо ахсаанаэмиэ көрүөххэ наада», — диэн Судаарыстыбаннай Дума бэрэссэдээтэлэ эрэлин биллэрдэ. Вячеслав Володин киллэрбит этиитэ социальнай-экэнэмиичэскэй усулуобуйаны учуоттаан ааҕарга кыах биэриэҕэ диэн дьокутааттар быһаараллар.