Ипотекалаах дьон сэрэниҥ!

Ипотеканан киирэн түөкүннээһин саҕаламмыт. Түөкүттэр баан үлэһитэбин диэн эрийэн баран, кирэдьииккин төлөөбөккө уһаппыккын дииллэр эбит. Ону төһө да төлөбүргүн кэмигэр уган иһэргин биллэргин да, түөкүттэр «баан үлэтигэр проблема тахсыбыт, ону суһаллык быһаара оҕус, эбиитин Кирэдьииттэр устуоруйаларын бюротугар иэскин уһаппытыҥ туһунан сибидиэнньэ киирбит» диэн бигэргэтэллэр эбит.

Салгыы түөкүттэр СНИЛС нүөмэрин уонна СМС нөҥүө кэлэр коду эт дииллэр. Ону ыллылар да, кинилэр госпорталга уонна онлайн-бааннарга тус бэйэҥ кабинеккар киирэр кыахтаналлар, счеттан харчы устуохтарын, кирэдьииккэ да ыйыахтарын сөп.

Өссө биир схема. Бу сырыыга түөкүттэр Арассыыйа Почтатын үлэһиттэрэбит диэн ааттанан, киһиэхэ тас дойдуттан баһыылкаҕын аҕалтараргар таможеннай хомууру төлүөххүн наада диэбиттэр. Киһи, биллэн турар, сакаастаабатах баһыылкатын төлүүртэн аккаастаммыт. Онуоха түөкүттэр, официально аккаастанар буоллаххына илии баттыаххын наада, онон СМС-нан кэлбит коду эт дииллэр эбит. Оттон коду эттиҥ да, бааныҥ мобильнай сыһыарыытыгар киирдэхтэрэ ол.