Ирина Любимова: “Айсен Сергеевич оҕолор көҕүлээһиннэрин куруук өйүүр”

Лоп курдук биэс сыл анараа өттүгэр Айсен Сергеевич Николаев өрөспүүбүлүкэбит Ил Дарханын эбээһинэһин толорооччу дуоһунаһыгар киирбитэ.

СӨ Үөрэҕин уонна билимин миниистирэ Ирина Любимова Ил Дархан биэс сыллаах үлэтинэн санаатын үллэстэр. Айсен Николаев өрөспүүбүлүкэ салайааччытын быһыытынан бастакы ыйаахтарыттан биирдэстэринэн 190 №-дээх үөрэҕи сайыннарар стартегическай хайысхалар туһунан ыйаах буоларын бэлиэтиир.

Бу Айсен Сергеевич аҕа уонна дьиэ кэргэн баһылыгын быһыытынан үүнэр көлүөнэни иитиигэ уонна сайыннарыыга, чуолаан патриотическай иитиигэ улахан болҕомтотун уурарын туоһулуур. Айсен Сергеевич көҕүлээһининэн биһиги эрэгийиэммит өссө 2019 сыллаахха “Биһиги – Арассыыйа кэскилэбит” бырайыагы олоххо киллэрэн саҕалаабыта. Бырайыак иитинэн өрөспүүбүлүкэ үөрэҕин тэрилтэлэригэр күннэтэ РФ Өрөгөй ырыатын толоруу быраактыката киирбитэ. Бу кэмтэн биирдиилээн оҕону (лчиность) иитэн таһаарыыга судаарыстыба, билим уонна уопсастыбаннай институттар бииргэ үлэлэһиилэрин саҥа көрүҥэ олохтоммута. Оҕо аймах уонна ыччат духуобунай, үтүө майгыга уонна Арассыыйа сайдыытын төрүт соругар сыһыарар хайысхалаах социальнай суолталаах контент тэриллибитэ. Маннык бырайыактартан биирдэстэринэн Айсен Николаев көҕүлээһининэн олоххо киирбит федеральнай суолталаах “Көр, бу — Арассыыйа” бырайыак буолар.

Үөрэх инфраструктуратын сайыннарбакка эрэ аныгы үөрэх эйгэтин тэрийэр кыаллыбат. Ил Дархан Айсен Николаев салалтатынан 2018-2022 сылларга үбүлээһин бары көрүҥнэринэн 10 234 миэстэлээх 48 оскуола, 7 807 миэстэлээх 69 уһуйаан, 1 идэҕэ бэлэмниир эбийиэк, 2 эбии үөрэхтээһин тэрилтэтин эбийиэгэ үлэҕэ киирбиттэрэ. Саҥа тутуулар бары ирдэнэр тэрилинэн хааччыллыбыт аныгы үөрэх комлексынан буолаллар. 300-тэн тахса “Үүнүү туочукалара” үөрэх кииннэрэ аһылыннылар. Ону тэҥэ, идэҕэ бэлэмниир үөрэх тэрилтэлэригэр саҥа мастарыскыайдар аһыллаллар. Онтон 2018 сыл бүтүүтэ Айсен Сергеевич “2022 сылга Саха сирин 100 талаана” бырагырааманан – бэйэтин ыйааҕынан Саха АССР төрүттэммитэ 100 сылын бэлиэтээһин саҥа тус сыаллаах соругун бигэргэппитэ. Бырагыраама, өрөспүүбүлүкэни социальнай-экэнэмиичэскэй өттүнэн сайыннарар инниттэн, исписэлиистэри тус сыаллаах бэлэмнээһин иитинэн Саха сирин олохтоохторун дойду, аан дойду бастыҥ үөрэҕин тэрилтэлэригэр үөрэтэр соруктаах.

Айсен Сергеевич оҕолор көҕүлээһиннэрин уонна оҕону сайыннарыыны кытта сибээстээх боппуруостары, ол иһигэр оҕо успуордун өрүү өйүүр. Ол курдук, кини сорудаҕынан, бу үөрэх дьылын саҥатыгар “Спортивные якутяне” оҕолор комплекснай спартакиадалара саҕаланарын туһунан биллэрбиппит. Бары улуустарга оскуола, улуус таһымнаах түһүмэхтэр ситиһиилээхтик аастылар итиэннэ бэс ыйын 5 күнүттэн Дьокуускай куоракка спартакиада түмүктүүр түһүмэҕэ саҕаланыаҕа.

Саха Өрөспүүбүлүкэтин үөрэҕин эйгэтэ Бүтүн Арассыыйатааҕы үөрэх систиэмэтин саҥардыыны кытта биир ситимнэнэн балысханнык сайдар. Бу биһигиттэн Ил Дархаммыт Айсен Николаев салайыытынан үрдүк соруктары толорору эрэйэр.