ИДьМ түмэлин эспэнээттэрин дьон сэргээтэ

Бүгүн Орджоникидзе болуоссатыгар  Улуу  Кыайыы 80 сылыгар анаммыт И.Ф. Дьячковскай аатынан Ис дьыала министиэристибэтин түмэлэ эспэнээттэри дьон-сэргэ көрүүтүгэр туруорда.

Түмэл методиһа Саргылаана Заболоцкая тэрээһин туһунан бу курдук билиһиннэрдэ:

— Аҕа дойду Улуу сэриитигэр Саха сириттэн 264 бэрээдэги араҥаччылыыр милииссийэ үлэһиттэрэ  кыттыбыттара. Ис дьыала министиэристибэтин мусуойун көһө сылдьар эспэнээттэрин үгүс киһи сэҥээрэн көрдө.

Манна бааллар биһиги түмэлбитигэр харалла сытар уоттаах сэриигэ кыайыыны аҕалбыт аптамааттар, пулеметтар, бэстилиэттэр. Эспэнээттэргэ Калашников аптамаата, 1942 сыллаахха сэбиэскэй конструктор Алексей Судаев айбыт пистолет-пулемета (ППС). Аҕа дойду Улуу сэриитигэр сүрүннээн бу сэби-сэбиргэли тутталлара. Сэрии саҕанааҕы хамандыыр фуражкатын уонна да атын малы-салы түмэл сэбиэдиссэйэ Александр Ярковой сиһилии кэпсээн, быһааран биэрэрин дьон бэркэ сэргээн иһиттэ.