Ис сүрэхтэн тахсар көмө эмтиир дьайыылаах

Москваҕа баар «Саха волонтердара» уопсастыбаннай хамсааһын үлэтин туһунан биһиги суруйан турабыт. Хамсааһын ааспыт сыл күһүнүгэр тэриллэн, волонтердар байыаннай дьайыыга кытта сылдьан эт-хаан эчэйиитин ылан, бааһыран госпиталларга сытар биир дойдулаахтарбытыгар тугунан да кэмнэммэт көмөнү оҥороллор.

Биһиги ааспыт сыл күһүнүгэр «Саха волонтердара» хамсааһын сүрүннээччитэ Туйаара Константинованы кытары кэпсэтэн турабыт. Онтон ыла балачча кэм ааста. Билигин хамсааһын үлэтэ хайдах баран иһэрин, көмө төһө оҥоһулларын туһунан кэпсэттибит.

Үтүө санаалаах дьон элбэх

Саха сирин дьоно ким төһө кыахтааҕынан көмөлөһөр, аһымал аахсыйанан 1000‑тан тахса биир дойдулаахтарбыт аһынан, үбүнэн көмөлөспүттэр. 2022 сыл алтынньытыттан 2023 сыл ыам ыйыгар диэри биирдиилээн дьон уопсайа 1 252 592 солк. көмөлөспүттэр. Ол курдук бааһырбыт байыастарга үлэ кэлэктииптэрэ, уопсастыбанньыктар, суруналыыстар, улуустар, нэһилиэктэр олохтоохторо көмөлөспүттэр.

«Саха волонтердара» хамсааһын волонтердара Москваҕа, Санкт-Петербурга, Ростовка, Казаньҥа, Екатеринбурга, Новосибирскайга, Краснодарга, Анапаҕа, Симферопольга, Севастопольга, Владивостокка, Хабаровскайга уонна Дьокуускайга, ону таһынан, Московскай уонна Ленинградскай уобаластарга бааллар. Волонтердар биһиги уолаттарбыт сытар госпиталларыгар күн аайы кэриэтэ ас астаан илдьэн аһаталлар, көрөллөр-истэллэр. Кинилэр көмөлөрүнэн Москва, Санкт-Петербург, Екатеринбург, Краснодар, Владивосток уонна Хабаровскай куораттарга 4 туонна ас-үөл (эт, балык, отон, кус, о. д.а.) бааһырбыт байыастарга анаан тиэрдилиннэ. Манна бэлиэтээн этиэххэ наада, Владислав уонна Светлана Диодоровтар көҕүлээһиннэринэн улуустар уонна нэһилиэктэр олохтоохторо эт-ас бөҕө хомуйан ыыталларын. Бу туоннанан бородууктаны «Якутия» авиахампаанньа тириэрдэр, ону Саха сирин Постпредствота уонна Тирэх пууннар ылан харайаллар.

Волонтер —  ис сүрэҕиттэн көмөлөһөр киһи

Волонтердар госпиталларга сылдьан бааһырбыт байыастары көрсөллөр, көрөллөр-истэллэр, кинилэргэ ас астаан илдьэллэр, күннээҕи туттуллар табаары атыылаһан тириэрдэллэр, гуманитарнай көмөнү тутан, наардыыллар, эт-хаан эчэйиитин ылбыт байыастары аэропортарга, баксаалларга атаараллар-көрсөллөр, кинилэр дьиэ кэргэттэрин кытары кэпсэтэллэр, көмө-өйөбүл буолаллар.

Кинилэр кимнээхтэрий? Биһиги уолаттарбытын өйүүр, тирэх буолар дьонунан, Санкт-Петербурга — Варвара Илларионова, Казаньҥа — Марианна Вафина, Екатеринбурга — Максим Матвеев, Симферопольга — Прасковья Бороненко, Севастопольга — Наталья Демина, Краснодарга — Евгения Буденная, Анапаҕа — Марина Черных, Владивостокка — Дьулустан Антонов, Хабаровскайга — Елена Лебедкина, Дьокуускайга Антонина Титова буолаллар.

Сайын көмө аҕыйыыр

Сайын, уоппуска үгэнэ буолан, дьон сынньана кэлэрэ-барара үксээн, көмөлөһөр дьон аҕыйыыр эбит. Волонтердарбыт эмиэ ким уоппускаҕа, ким дойдутугар кэлбит буолан, хаалбыт дьон уонна Постпредство иһинэн баар Биир кэлим сүрүннүүр киин үлэһиттэрэ көмө ас-үөл кэллэҕинэ таһаллар, госпиталларга сылдьаллар диэн «Саха волонтердара» хамсааһын сүрүннээччитэ Туйаара Константинова кэпсиир. Кини бу күннэргэ дойдутугар кэлэн сынньана сылдьар.

«Үксүбүт уоппускаҕа баран, билигин Биир кэлим сүрүннүүр киин үлэһиттэрэ волонтердары солбуйа сылдьаллар, онон үлэ бара турар. Оттон атын куораттарбытын ылан көрдөххө, волонтердарбыт бааллар, онон үлэ тэтимэ уларыйбата. Хамсааһын сүрүн үлэһиттэрэ уоппускаҕа сылдьалларынан, билиҥҥитэ үбүнэн көмө тохтотуллан турар, ол гынан баран, мэлдьи көмөлөһөр ийэлэр, эбээлэр хамнастарын, биэнсийэлэрин сыыһыттан ыыта тураллар. Бу үбүнэн госпиталларга сытар уолаттарбытыгар ас-таҥас, күннээҕи туттар табаары ылан биэрэбит. Биллэн турар, госпиталларга ас-таҥас татымын бэйэҕит билэҕит, оттон уолаттарбыт иҥэмтиэлээх дьиэ аһын аһаатахтарына, көмө-өйөбүл баарын биллэхтэринэ, түргэнник үтүөрэллэр, санаалара бөҕөргүүр», — Туйаара Константинова кэпсиир.

Көмө хаһан баҕарар наада

Күн аайы уолаттарбыт госпиталларга киирэ тураллар, кинилэргэ, эппиппит курдук, барыларыгар көмөлөһүөххэ, аһатыахха-таҥыннарыахха наада, ол барыта үбү эрэйэр. Онуоха «Саха волонтердара» хамсааһын үлэһиттэрэ үбү көрдүүр суолу тобулаллар.

«Биһиги сыл аҥаарыгар быһа холоон 1 мөл. 400 тыһ. солк. курдугу туттубут буоллахпытына, ол аата сылга 3 мөл. солк курдук наада буолар диэн ааҕынан көрөммүт, «Мы вместе» аан дойдутааҕы бириэмийэҕэ сайаапка биэрбиппит. Ол сайаапкабыт бастаан эрэгийиэннээҕи куонкуруһу ааһыахтаах, түмүгэ балаҕан ыйыгар биллиэхтээх. Манан ылан эттэххэ, итинник үбүлээһин хайысхата эмиэ баар эбит диэн киирсэ сатыыбыт. Урут бааһырбыт байыастарга маннык көмөлөһүү диэн суох буоллаҕа, арай, «Красный Крест» былыргыттан баар, оттон Арассыыйаҕа «Своих не бросаем» диэн пуонда тэриллэн саҥа үлэлии, атаҕар тура сылдьар. Билигин бу пуонданы кытары үлэлэһэ сылдьабыт. Төһө даҕаны атын сиртэн үбүлээһин суолун-ииһин тобула сатаатарбыт, син биир биирдиилээн дьон көмөтүгэр эрэнэбит. Тэриллиэхпититтэн биир дойдулаахтарбыт, Сахабыт сирин дьонун-сэргэтин көмөтүнэн үлэлээн кэллибит», — «Саха волонтердара» хамсааһын сүрүннээччитэ көмө туһунан кэпсиир.

Уолаттарбытыгар көмөлөһөр — ытык иэспит

Олоххо араас буолар, киһи хайдах дьаһанарын бэйэтэ быһаарынар. Үгүстүк байыаннай дьайыыга сылдьар уолаттардаах, онно сыһыаннаах дьон — ийэлэрэ, кэргэттэрэ, аймахтара көмөлөһөллөр. «Саха волонтердара» хамсааһыҥҥа дьон баҕа өттүнэн, бэйэлэрин сүрүн үлэлэрин таһынан үлэлииллэр. Кинилэр этэллэринэн, ис сүрэхтэн көмөлөһөр баҕалаах буоллаххына — барыта кыаллар.

Билигин Москваҕа үлэлээбит волонтердар дойдуларыгар кэлбит буоланнар, онно аҕыйах киһи үлэлиир. Онон Москваҕа күүлэйдии барааччы эбэтэр өр кэмҥэ олоро тиийээччи киһи, ким баҕалаах, волонтер быһыытынан көмөлөһүөн сөп. «Саха волонтердара» хаһан баҕарар көмөлөһөр киһиэхэ наадыйаллар. Көмөлөһүөн баҕалаах дьон баар буоллаххытына, Саха волонтердара» хамсааһын сүрүннээччитэ Саха сиригэр баар кэмигэр көрсөн кэпсэтиэххитин, билсиэххитин сөп. Байыаннай дьайыы бүтүөр диэри уолаттарбытыгар син биир көмө, өйөбүл наада буолара чуолкай. Онон, ис сүрэхтэн көмөлөһүөн баҕалаах дьон «Саха волонтердара» хамсааһыҥҥа кыттыһыахтара диэн эрэнэбин. Кылаабынайа, биһиги бэйэбит уолаттарбытыгар көмөлөһөбүт, кинилэргэ кыһаллабыт, кинилэр Аҕа дойду интэриэһин көмүскээн эт-хаан эчэйиитин ылбыттарын иһин, кинилэр иннилэригэр иэспитин төлүүбүт диэн өйдүөхтээхпит.