Уһулуччулаах судаарыстыбаннай, уопсастыбаннай-бэлитиичэскэй диэйэтэл, Саха сирин автономиятын төрүттээччи Исидор Никифорович Барахов төрөөбүтэ 125 сылын чэрчитинэн, төрөөбүт күнүн көрсө (олунньу 12 күнэ) кэккэ тэрээһиннэр саҕаланнылар.
Саҥа дьыл иннинэ, Саха Өрөспүүбүлүкэтин Суруйааччыларын сойууһун VII сийиэһин күн, суруйааччы Алексей Амбросьев-Сиэн Мунду “Исидор Барахов” диэн дьоһуннаах үлэтэ кинигэ буолан тахсыбытын илиитигэр туппута. Кинигэ Москваҕа “Эдэр гвардия” издательствоҕа “Уһулуччулаах дьон олохторо” (ЖЗЛ) сиэрийэнэн таҕыста, 350-ча сирэйдээх.
Онон, суруйааччы, тылбаасчыт, публицист Сиэн Мунду өссө биир дьоһуннаах кинигэтэ тохсунньу 19 күнүгэр Национальнай бибилэтиэкэ Историческай саалатыгар сүрэхтэниэҕэ.
Ону таһынан, Үөһээ Бүлүү улууһун дьаһалтата иһитиннэрбитинэн, Уйбаан Ороһуунускай тылларыгар, олохтоох мелодистар В.В. Ефимов-Баянист Баака, Т.И. Шестаков матыыптарыгар Исиидэр Бараахап төрөөбүтэ 100 сылыгар ананан суруллубут «Бараахап туһунан ырыа» нууччалыы тылбааһыгар өрөспүүбүлүкэтээҕи аһаҕас күрэх биллэрилиннэ. Күрэх сүрүн сыалынан-соругунан Исидор Барахов үтүө аатын киэҥ эйгэҕэ тарҕатыы, үүнэр көлүөнэни устуоруйа чахчыларыгар олоҕуран иитии-үөрэтии, «Бараахап туһунан ырыа» сахалыы ырыаны нууччалыы ыллатан, саха чулуу уолун аатын Арассыыйаҕа билиниилэрин ситиһии буолар.
Дьүүллүүр сүбэ быһаарыытынан, кыайыылаахха «Кылаан чыпчаал» аат иҥэриллиэҕэ уонна быйыл И.Н. Барахов төрөөбүтэ 125 сылыгар анаан Москваҕа ыытыллар тэрээһиннэргэ ылланыаҕа.
Кыттааччы анал анкетаны, тылбааһын vanessanik0603@mail.ru электроннай аадырыска 2023 сыл олунньу 1 күнүгэр диэри ыытыан сөп.
«Бараахап туһунан ырыа» тыллара
Дьол, көҥүл кыайарын туһугар
Дьаалхааннаах охсуһуу дьылыгар,
Хотойдуу кэккэҕэ көппүтүҥ,
Харбалаах буоруттан үүммүтүҥ.
Хос ырыата:
Номохтоох олоҕуҥ анала,
Норуотуҥ махтала, таптала
Бараахап, тыыннаахтан тыыннааххын,
Барҕарыы суолларын ыйаҕын.
Сахабыт саргытын салайсан
Хараҥа хараҕын аспыккыт,
Сырдыктаах аартыгы арыйан
Харса суох инники киирбиккит.
Хос ырыата:
Номохтоох олоҕуҥ анала,
Норуотуҥ махтала, таптала
Бараахап тыыннаахтан тыыннааххын,
Барҕарыы суолларын ыйаҕын.
Эрчимнээх, төлөннөөх сүрэҕэ
Саха дьон туһугар тэбиэхтин,
Сандаарар үйэттэн-үйэҕэ
Эн аатыҥ өрүүтүн тиллиэхтин.
Хос ырыата:
Номохтоох олоҕуҥ анала,
Норуотуҥ махтала, таптала
Бараахап тыыннаахтан тыыннааххын,
Барҕарыы суолларын ыйаҕын.
Соторутааҕыта Дьокуускайга оҕолорго уонна ыччаттарга I өрөспүүбүлүкэтээҕи төрүт култуураҕа чөмпүйэнээт буолан ааста. Төрүт сахалыы эйгэни…
Маны таһынан тустууга киһи ис күүһэ улахан оруоллаах. Бу, дьиҥэр, үөрэтиллибэтэх эйгэ. Биирдэ өрдөөҕүтэ биир…
Биллиилээх суруйааччы, суруналыыс, Аҕа дойду Улуу сэриитин кыттыылааҕа, танкист, Албан аат III истиэпэннээх уордьан, бойобуой…
Бүлүү улууһун баһылыга С.Н.Винокуров, улуус дьокутааттарын бэрэссэдээтэлэ Г.С. Корякин салалталарынан улуус нэһилиэгин дьокутааттара СӨ муниципальнай…
РФ Бырабыыталыстыбатыгар "Уһук Илин сулуһа" уопсастыбаннай-дьыалабыай бириэмийэни туттарыы үөрүүлээх тэрээһинэ буолла. "Гектар Победы" номинация кыайыылааҕынан…
Бытарҕан тымныыга быычыкаайык чыычаахтар тоҥмокко, ас көрдөөн букунайалларын көрөн, аһына саныыбын. Хайдах тоҥон, үлүйэн хаалбаттара…