Хаартыска: И.Барахов аатынан түмэл пуондатыттан.
Уһулуччулаах судаарыстыбаннай уонна бэлитиичэскэй диэйэтэл И.Н. Барахов төрөөбүт сиригэр, Үөһээ Бүлүү улууһун Харбалааҕар баар кини аатынан СӨ Судаарыстыбаннаһын түмэлигэр үгүс интэриэһинэй эспэнээт харалла сытар.
Исидор Барахов аатынан түмэл 2001 сыллаахха Н.Золотарев-Якутскай түмэлигэр биир хоско тэриллибитэ. Манна истиэндэлэр, хаартыскалар, докумуоннар бааллара.
2012 сыл ахсынньытыгар түмэл саҥа дьиэтэ тутуллан киирбитэ. 2013 сыл кулун тутар 26 күнүгэр СӨ Бэрэсидьиэнэ Е.А. Борисов сорудаҕын толорон, И.Н. Барахов аатынан СӨ судаарыстыбаннаһын түмэлэ – Е.Ярославскай аатынан судаарыстыбаннай култуура, этнография түмэлин филиала тэриллибитэ.
Түмэл үс экспозиционнай саалалаах.
Бүгүн И.Н. Барахов аатынан СӨ судаарыстыбаннаһын түмэлин үлэһиттэрэ Светлана Даниловна Копыленко, Евдокия Павловна Семенова хараллан сытар ураты экспонаттар тустарынан сырдаталлар.
Исидор Барахов 1928 сыллаахха Кыһыл Профессура институтугар экэниэмикэ салаатыгар үөрэнэ киирэр. Бу үрдүкү партийнай үөрэххэ ньиэмэс тылын үөрэтэллэр. Бу тылы билбэт истээччи үһүс куурустан ууратыллар гына кытаанах үлэ ыытыллара. Оччолорго туох баар научнай кинигэлэр ньиэмэс тылынан этилэр. Исидор Барахов бу тылы хайдах үөрэппитин туһунан учууталларын сыанабылларын музейга кэлэн көрүөххэ сөп. Үөрэнэр кэмигэр научнай үлэтин суруйарыгар 13 омук бөлүһүөктэрин кинигэтин бу тылынан аахпыта, туһаммыта биллэр. “Ньиэмэстии-нууччалыы тылдьыт” титульнай лииһигэр И.Барахов илии баттааһына баар.
Коммунистическай баартыйа устуоруйата дьиҥ кырдьыгынан суруллубут буолан, бу кинигэни мунньар дьон олус сыаналыыллар. Бу учуобунньугу Исидор Барахов хас биирдии лииһин дириҥник ырытан үөрэппитин туоһута – лиис аайы кыһыл, күөх харандааһынан бэлиэтээбитэ, суруйбута буолар. Кинигэҕэ репрессия ыар тыына кытта биллибит. Ол курдук норуот өстөөҕө буолбут киһи аата сотуллубут, хаартыската оҥо быһыллыбыт.
Сүөһү иитиитигэр аналлаах тиэрминнэр ыйынньыктарыгар И.Барахов илии баттааһына кинигэ титульнай лииһигэр баар. Бу кинигэ улахан салайааччы бары хайысханан бэйэтин сайыннарарын, элбэҕи ааҕарын туоһулуур.
Маны тэҥэ, музейга кэлбит дьон иккис экспозиционнай саалаҕа истиэнэни биир гына ыйаммыт “Бастакы Сүрүннүүр сийиэс кыттыылаахтара” диэн эдэр өрөспүүбүлүкэбит инникитин торумнуур улуу мунньахха кыттыбыт норуот чулуу дьонун худуоһунньук Ф.Г. Макаров хартыына гынан үйэтиппитин көрүөхтэрэ.
И.Н. Барахов кабинетын миэбэлэ, кэргэнэ Александра Андреевна Черепанова-Барахова иистэнэр массыыната, Исидор Никифорович кэтэ сылдьыбыт көстүүмэ, дьиэ кэргэнин иһитэ уо.д.а., атын ханнык да музейга суох экспонаттар бааллар.
Түмэл тиэргэнигэр И.Н. Барахов төрөөбүт-үөскээбит дьиэтэ баар. Түмэл үлэһиттэрэ дьиэ ис бараанын сорҕотун сөргүппүттэрэ. Онон манна атыыһыт Никифор Барахов дьиэ кэргэнин малларын, миэбэллэрин көрүөххэ, устуоруйа былыргы тыынын иҥэриниэххэ сөп.
Хаартыска: И.Н. Барахов аатынан СӨ судаарыстыбаннаһын түмэлин пуондатыттан.
Дьокуускай куоракка Муниципальнай тэриллиилэр бэрэстэбиитэллээх уорганнарын, дьокутааттарын 3-с сийиэһэ буола турар. Сийиэс үлэтин чэрчитинэн, Ил…
СӨ борокуруора Сергей Дябкин сорудаҕынан, Таатта оройуонун борокуратуурата Н.Е. Мординов-Амма Аччыгыйа аатынан Харбалаахтааҕы үөрэх комплексын…
Национальнай сыаллары ситиһэргэ сыһыаннаах боппуруостар уонна систиэмэлээх соруктар бырабыыталыстыба, министиэристибэлэр уонна биэдэмистибэлэр, муниципальнай тэриллиилэр баһылыктарыттан…
Бу чааска Дьокуускай куорат мээрэ Евгений Григорьев суруналыыстары кытта көрсүһүүтэ буола турар. Мээр сыл аайы…
Судаарыстыбаннай Дуума элбэх кыбартыыралаах дьиэ сэбиэтин чилиэннэригэр баайы-дуолу көрүүгэ-харайыыга үлэ уонна өҥө толоруллуутун туһунан докумуоннарга…
Урут сууттана сылдьыбыт Дьокуускай олохтооҕо пневматическай бинтиэпкэни, бэстилиэти уонна унтууну кыбартыыраттан уоран тутулунна. Бу туһунан…