Исидор Барахов мэҥэ тааһыгар сүгүрүйдүлэр

Судаарыстыбаннас күнүн көрсө саха норуотун чулуу уола, судаарыстыбаннай, уопсастыбаннай диэйэтэл Исидор Никифорович Барахов мэҥэ тааһыгар кини төрөөбүт сиригэр — Үөһээ Бүлүү Харбалааҕар  сүгүрүйдүлэр.

Харбалаахха Барахов пааматынньыгар сибэккини ууруу сиэригэр-туомугар Ил Дархан, бырабыыталыстыба дьаһалтатын салайааччы Георгий Михайлов, тырааныспар, суол хаһаайыстыбатын миниистирэ Владимир Сивцев, Үөһээ Бүлүү улууһун баһылыга Валерий Николаев, уопсастыбанньыктар, олохтоохтор кытыннылар.

Георгий Михайлов тыл этэригэр Исидор Барахов дьылҕата Саха сирин сайдыытын устуоруйатын кытта ыкса сибээстээх, норуотун олоҕо тупсарыгар киллэрбит кылаатын сыаната муҥура суох диэн эттэ. Саха АССР судаарыстыбаннаһын Исидор Барахов төрүттэспит киһи буолар.

Манна Судаарыстыбаннас күнүн көрсө уопсастыбаннас үөрүүлээх мунньаҕа буолла. Маны тэҥэ, Харбалаахха Исидор Барахов аатынан ааттаммыт, саҥа аспаалламмыт уулуссаны үөрүүлээх быһыыга-майгыга арыйдылар. Былырыыҥҥыттан ыла 600 м уһуннаах сиргэ үлэ барбыт.

Харбалаах нэһилиэгэр Исидор Барахов аатынан Култуура киинэ тутулла турар. Бу сыл бүтүөр диэри тутуллан бүтүөхтээх.

Ил Дархан, бырабыыталыстыба дьаһалтатын пресс-сулууспата.