Искибиэри көрүү-истии — олохтоох дьаһалта боломуочуйата

Кэлиҥҥи сылларга улуус  кииннэригэр уонна нэһилиэктэргэ араас искибиэрдэри, былаһааккалары, пааркалары тутар буоллулар.

Кыһыҥҥы кэмҥэ маннык бэлиэ сирдэргэ баар пааматынньыктар хаарынан, сайын бөҕүнэн туолар холобурдара баар чахчы. Горнай улууһугар ыытыллыбыт ситэриилээх былаас отчуотугар Бэрдьигэстээх сэлиэнньэтин дьаһалтатын  ыччат ааҕыныстыбатын исписэлииһэ Роман Дмитриев «Искибиэрдэри уонна пааматынньыктары хомуйууга ыччаттар субуотунньуктары тэрийэллэр, пааркалары уонна искибиэрдэри көрүүгэ-истиигэ судаарыстыбаттан туох үбүнэн өйөбүл баарый?», —диэн ыйытта.

Маныаха Үп  миниистирин солбуйааччы Надежда Филиппова хоруйа маннык буолла:

— Дьон сынньанар искибиэрдэрин олохтоохтор улуустарын, нэһилиэктэрин ааттаппыт биллиилээх дьонноругар анаан оҥороллор. Бу былаһааккалары олохтоох бэйэни салайыныы уоргана — нэһилиэк дьаһалтата бэйэтин боломуочуйатыгар ылар. Улуус кииннэригэр олорор сири тупсарыыга уонна олохтоох суолу көрүүгэ-истиигэ анаан  муниципальнай тэрилтэ тэрийэллэр. Онон кинилэр искибиэрдэри хомуйаллар, ыраастыыллар. Оттон нэһилиэктэргэ баһылык уурааҕынан искибиэрдэри, былаһааккалары көрүүнү-истиини тэрилтэлэргэ сыһыаран биэрэллэр эбэтэр оскуола оҕолоро, уопсастыбанньыктар болҕомтоҕо ылаллар. Онон искибиэри, былаһааккалары көрүү-истии — олохтоох дьаһалта боломуочуйата.