Испания профессора Саха сирин култууратын Европаҕа көрдөрөр

Испания профессора, этнограф, историческай наука дуоктара Кармен Арнау Муро Европаҕа соҕотох ураты түмэли тэрийбит. 

Бу түмэл Сибиир уонна Киин Азия олохтоохторугар анаммыт.  Бу туһунан «Якутия 24» сырдаппыт. 20 сыллааҕыта Кармен кэргэнин кытта 400 гектар сири былыргы Рим некрополын уонна арааб кириэппэһин таһыгар ылбыттар.  Бэйэлэрин тус үптэринэн түмэл төрүттээн саҕалаабыттар. Биир бастакы тутуунан  саха балаҕана буолбут. Эрдэттэн манна Саха сирин тутууга маастардара көмөлүөхтээхтэрин туһунан былаан баара эрээри, тас дойдуга виза кыайтарбакка былаан олоххо киирбэтэх.

Бүгүҥҥү күҥҥэ саха балаҕана саамай улахан уонна ыалдьыттары көрсөр сүрүн тутуунан буолар.  Кармен этэринэн, Испания олохтоохторун угуйууга атын норуоттар муусукаларын уонна куукуналарын билиһиннэрии буолар. Түмэл хаһаайката  Саха норуотун ыһыаҕын тэрийиигэ Европаҕа олорор Саха диаспоратын кытта ыкса сибээһи тутар. Манна саха эрэ балаҕана буолбакка, хакастар, узбектар, казах омуктар балаҕаннара эмиэ баар. Балартан бүтэһик тутуу Нурсултан Назарбаев бэлэҕэ буолар.  Манна  дьиҥнээх баанньыгы уонна саха норуотун былыргы киһи уҥуоҕун эргиирин макыата баар. Бары эспэнээттэр доҕоттор бэлэхтэрэ буолаллар. Бу түмэл Испания профессорын тайҕаҕа, истиэпкэ, дьонугар-сэргэтигэр  тапталын туоһута буолар.