Истипиэндьийэни тиийинэн олоруу алын кээмэйигэр диэри үрдэтэри туруорсаллар

Устудьуоннар истипиэндьийэлэрин тиийинэн олоруу алын кээмэйигэр диэри улаатыннарар туһунан сокуон барылын дьокутааттар бырабыыталыстыбаҕа киллэрдилэр. «Справедливая Россия — За правду» баартыйа бэрэссэдээтэлэ Сергей Миронов уонна фракция салайааччытын бастакы солбуйааччы Дмитрий Гусев бу сокуон барылын оҥордулар диэн ТАСС иһитиннэрэр.

Кинилэр  «Об образовании в Российской Федерации» сокуоҥҥа уларытыылары киллэрэр туһунан этиилээхтэр. Бүддьүөттэн төлөнөр, саамай кыра кээмэйдээх истипиэндьийэ эрэгийиэҥҥэ олохтоммут тиийинэн олоруу алын кээмэйиттэн кыра буолуо суохтаах диэн туруорсаллар.

Сокуон барыла истипиэндьийэни устудьуону үөрэнэр кэмигэр  олоҕун сөптөөх таһымыны хааччыйар, өйүүр төлөбүр быһыытынан быһаарары чуолкайдыыр. Оттон билиҥҥи сокуоҥҥа истипиэндьийэ үөрэнэргэ көҕүлүүр төлөбүр курдук көрүллэр.  Бу маннык көрүү тутах, устудьуон быраабын кэһэр диэн дьокутааттар этэллэр.

Сергей Миронов этэринэн, киин үрдүк үөрэххэ үөрэнэр устудьуоннар истипиэндьийэлэрэ 2  тыһыынча солкуобайга, тиэхиньикум үөрэнээччилэригэр 1 тыһыынча солкуобайга тэҥнэһэр.

Истипиэндьийэ хаһан да үрдээбэт, инфляция диэни аахсыбат, уонунан сылларга биир кээмэйдээх. Онон устудьуоннар үөрэнэ-үөрэнэ түүннэри үлэлии барарга күһэллэллэр, эбэтэр, төрөппүттэригэр толору иитиллэллэр. Маннык балаһыанньа кинилэр үөрэхтэрин таһымыгар дьайар.