XXV кыһыҥҥы Олимпийскай оонньууларга Арассыыйаттан 13 күрэсчит кыттыаҕа

XXV кыһыҥҥы Олимпийскай оонньуулар аһыллыахтарыгар диэри нэдиэлэ  хаалла. Оонньуулар олунньу 6 күнүттэн 22 күнүгэр диэри Италияҕа ыытыллыахтара. Күрэсчиттэри икки куорат – Милан уонна Кортина-д’Ампеццо көрсүөҕэ.

Италия устуоруйатыгар бу төрдүс Олимпиадата буолуоҕа. Кортина-д’Ампеццо аан бастаан күрэсчиттэри 1956 сыллаахха кыһыҥҥы оонньууларга көрсүбүтэ. Түөрт сыл буолан баран, Римҥэ сайыҥҥы Олимпиада, оттон 2006 сыллаахха Туриҥҥа кыһыҥҥы Олимпиада буолбуттара. Дьэ, 20 сыл буолан баран, Италия эмиэ саҥа наҕараадалары оонньотор: 16 успуорт көрүҥэр барыта 116 мэтээл кэмпилиэгэ бигэргэтилиннэ.

Үөрүүлээх аһыллыы сиэрэ-туома Милаҥҥа «Сан-Сиро» стадиоҥҥа ыытыллыаҕа. Москва бириэмэтинэн киэһэ 22:00 чааска саҕаланыа. Көрөөччүлэр иннилэригэр Америка поп-сулуһа Мэрайя Кэри, Италия ырыаһыта Лаура Паузини уонна легендарнай тенор Андреа Бочелли ырыа-тойук бэлэхтиэхтэрэ диэн иһитиннэрэллэр. Оттон арыыллытын сиэригэр-туомугар кыттыылаахтарын кэккэтигэр Италия актрисалара Сабрина Импаччиаторе («Белый лотос», 2-с сезон) уонна Матильда Де Анджелис («Итальянская гонщица», «Отыграть назад») баллар.

Күрэхтэһиилэргэ  барыта 25  успуорт эбийиэгэ бэлэмнэннэ: 19-һа номнуо үлэлиир, иккитэ саҥаттан тутулунна, оттон түөрдэ – быстах кэмнээҕи былаһааккалар. Милан мууска сыһыаннаах успуорт көрүҥнэрин киининэн буолуо, оттон Кортина-д’Ампеццоҕа уонна чугастааҕы провинцияларга хаарга сыһыаннаах көрүҥнэрэ ыытыллыахтара. Оонньууларга аан бастаан ски-альпинизмҥа күрэхтэһиилэр буолуохтара..

Арассыыйа күрэсчиттэрэ Олимпиадаҕа нейтральнай статустаах кытталлара көҥүллэннэ. Бу чэрчитинэн атлеттар дойду национальнай бэлиэлэрин – былааҕы, өрөгөй ырыатын уонна гиэрбэни туттар бырааптара суох.  Күрэсчиттэр AIN (Athlete Individuel Neutre – ааҥыл тылыттан «бэйэтинэн кыттар нейтральнай атлет» диэн тылбаастанар) аббревиатуранан кыттыахтара.

Норуоттар икки ардыларынааҕы Олимпийскай кэмитиэттэн (МОК) официальнайдык көҥүлү ылбыт күрэсчиттэр:

• Аделия Петросян (фигурнай хаҥкы);
• Петр Гуменник (фигурнай хаҥкы);
• Дарья Непряева (хайыһар);
• Савелий Коростелев (хайыһар);
• Ксения Коржова (хаҥкылаах сүүрүү);
• Анастасия Семенова (хаҥкылаах сүүрүү);
• Алена Крылова (шорт-трек);
• Иван Посашков (шорт-трек);
• Никита Филиппов (ски-альпинизм);
• Дарья Олесик (сыарҕа успуорда);
• Павел Репилов (сыарҕа успуорда);
• Семен Ефимов (хайа хайыһарын успуорда);
• Юлия Плешкова (хайа хайыһарын успуорда).

Оонньуулар араспысаанньата

• фигурнай хаҥкы: мэтээллэр олунньу 8, 11, 13, 16 уонна 19 күннэригэр оонньонуохтара;
• хоккей: финаллар олунньу 19 (дьахтар) уонна 22 (эр дьон) күннэригэр буолуохтара;
• хайыһардьыттар, биатлонистар уонна хаҥкыһыттар наҕараада иһин күн аайы кэриэтэ күрэхтэһиэхтэрэ;
• хайа хайыһарын успуорда уонна сноуборд: күрэхтэһиилэр олунньу 7 күнүттэн 18 күнүгэр диэри ыытыллыахтара;
• трамплинтан ыстаныы: кэмпилиэктэр олунньу 7, 9, 10, 14 уонна 16 күннэригэр оонньонуохтара;
• шорт-трек: күрэхтэһиилэр олунньу 10, 12, 14, 16, 18 уонна 20 күннэригэр буолуохтара;
• сыарҕа успуорда: мэтээл иһин киирсии олунньу 8, 10, 11 уонна 12 күннэригэр ыытыллыаҕа;
• керлинг: финаллар олунньу 10 уонна 20–22 күннэригэр буолуохтара;
• хайыһар двоеборьета: күрэхтэһиилэр олунньу 11, 17 уонна 19 күннэригэр ыытыллыахтара;
• скелетон: турнир олунньу 13 күнүттэн 15 күнүгэр диэри буолуоҕа;
• бобслей: оонньуулар олунньу 16–22 күннэригэр былааннаналлар;
• фристайл: мэтээл кэмпилиэктэрэ олунньу 9–12, онтон 14–21 күннэригэр оонньонуохтара;
• ски-альпинизм: турнир олунньу 19 уонна 21 күннэригэр буолуоҕа.

Олимпийскай оонньуулары көрдөрөр быраабы Okko стриминг-сервис атыыласпыта, бу туһунан 2026 сыл тохсунньу 21 күнүгэр биллибитэ. Федеральнай телеханаал буолбакка, онлайн-киинэ тыйаатыра көрдөрөр бастакы түбэлтэтэ.

Успуорт миниистирэ, Арассыыйа Олимпийскай кэмитиэтин бэрэссэдээтэлэ Михаил Дегтярев иһитиннэрбитинэн, платформаҕа аһыллыы сиэрин-туомун, бары  күрэхтэһиилэри, ол иһигэр финаллары, уонна үөрүүлээх сабыллыыны көрүөххэ сөп. Итиниэхэ быһа эпииринэн да, устуллубут кэриҥинэн да көстүөхтэрэ.