«Итии лииньийэҕэ» анал байыаннай эпэрээссийэҕэ сыһыаннаах 28 тыһ. ыйытыы киирдэ

Саха сиригэр анал дьайыылар кыттыылаахтарыгар уонна кинилэр дьиэ кэргэттэригэр үөскээбит боппуруостары 122 нүөмэргэ «итии лииньийэ» исписэлиистэрэ быһаараллар.

Мобилизация саҕаланыаҕыттан «итии лииньийэҕэ» 28 тыһыынча боппуруос киирдэ. Бу туһунан бүгүн брифиҥҥэ 122 «итии лииньийэ» салайааччыта Мария Винокурова иһитиннэрдэ.
«Кэнники кэмҥэ 122 «итии лииньийэҕэ» ыйытыы киириитэ аҕыйаата. Онон «итии лииньийэҕэ» киирэр боппуруостары Оборуона министиэристибэтигэр тута холбуур чэпчээтэ. Арааһа, Арассыыйа үрдүнэн быстах мобилизацияҕа сыһыаннаах боппуруос аҕыйаата быһыылаах», – диэн бэлиэтээтэ кини.
Мария Винокурова этэринэн, 122 «итии лииньийэ» исписэлиистэрэ олоххо буолар араас боппуруоһу барытын быһаарарга көмөлөһөллөр. Холобур, мобилизацияламмыт киһи кэргэнэ төлөпүөнүнэн эрийэн, кини харчынан төлөбүргэ сайабылыанньа биэрэригэр кэргэнин урукку баанын каартатын нүөмэрин ыйбыт, дьиҥэр, байыаннай чааска бэриллибит каарта нүөмэрин суруйуохтаах эбит.

«Бу этиллибит киһиттэн уратыларга барыларыгар харчылара киирбит, арай, киниэхэ эрэ суох эбит. Ону биһиги Арассыыйа Национальнай баанын Саха сиринээҕи салаатын кытары сибээстэһэммит, бу киһи кэргэнигэр суһаллык көмөлөһөн, харчыларын ылбыттара», – диэн кэпсээтэ Мария Винокурова.
Итини таһынан мобилизацияламмыт киһи кыыһыгар үрдэтиллибит истипиэндийэни ыларыгар көмөлөспүттэр. «Кини биир кэмнээх төлөбүргэ, тус сыаллаах үөрэххэ уонна истипиэндийэни үрдэтиигэ сайабылыанньа биэрбит. Ол кэннэ төрөппүттэрэ арахсан, тус-туспа олорбуттарынан сибээстээн, үрдэтиллибит истипиэндийэни төлүүртэн аккаастаабыттарын туһунан ахсынньы саҥатыгар сурук кэлбит. СӨ Үөрэҕин уонна наукатын министиэристибэтигэр туруорсан, боппуруос быһаарыллан, билигин анал байыаннай эпэрээссийэ кыттыылааҕын кыыһын быһыытынан үрдэтиллибит истипиэндийэни ылар буоллла» – диэтэ салайааччы.
Чуолаан, байыаннай сулууспалаахтар дьиэ кэргэттэригэр көмө уонна баһыылкалары хайдах ыытар туһунан боппуруостар киирэллэр эбит. «Байыаннай сулууспалаахтар аймахтара бэйэлэрин суруктарын уонна баһыылкаларын «Арассыыйа Почтатын» чугастааҕы отделениетынан, маннык аадырыска: 103400, г. Москва-400 (салгыы байыаннай чаас нүөмэрэ суруллар) ыытыахтарын сөп. Чопчу аадырыстарын байыаннай сулууспалаахтартан бэйэлэриттэн ыйытан эбэтэр ыҥырыллыбыт сирин байыаннай комиссариатыттан билиэххитин сөп», – диэтэ Мария Винокурова.

Байыаннай сулууспалаахтар дьиэ кэргэттэригэр босхо юридическай көмө туһунан боппуруостар үгүстүк киирэллэр. Юридическай боппуруоһунан МФЦ филиалларыгар, ону тэҥэ СӨ Адвокатскай балаататыгар, Дьокуускай куорат, Пушкин уул. 22/1, тел. 32-53-72, билсиэххитин сөп: ap_rs_y@mail.ru