Итирик сылдьан тиэргэҥҥэ турар массыына сиэркилэтин алдьаппыт

Полицияҕа куорат олохтооҕо кэлэн, Ленин проспегар турар массыынатын сиэркилэлэрин алдьаппыттарын туһунан иһитиннэрбит.

Хоромньу быһа холоон алта тыһыынча солкуобайынан сыаналаммыт. Учаастактааҕы боломуочунай уорбаланааччы ким буоларын быһаарбыт. Хара санаалаах «вандал» буруйу оҥорор кэмигэр итирик туруктаах сылдьыбыт 50 саастаах олохтоох эр киһи буолара биллибит. Быһа барыллаан, буруйдаах киһи киэһэ хойут тиэргэнинэн ааһан иһэн, турар массыына сиэркилэтин  биричиинэтэ суох саайбыт. Уорбаланааччы оҥоһуллубут матырыйаалынай хоромньуну толуйарга бэлэмин биллэрбит. Бу чахчынан РФ Холуобунай кодексатын 167-с ыстатыйатын 1-кы чааһынан («Соруйан баайы-дуолу алдьатыы эбэтэр суох оҥоруу») холуобунай дьыала көбүтүлүннэ. Эр киһи икки сылга диэри көҥүлэ быһыллыан сөп.