Итирик суоппар икки оҕону түҥнэри көппүтүнэн дьыала тэрилиннэ

Дьокуускай куораттааҕы силиэстийэлиир отдела итирик туруктаах сылдьан суол быраабылатын кэһэн, икки оҕо өлүүтүгэр тиэрдибит 36 саастаах эр киһиэхэ холуобунай дьыала тэрийдэ.

Бу туһунан Саха сиринээҕи Силиэстийэлиир кэмитиэтэ иһитиннэрэр. Силиэстийэ дааннайынан, атырдьах ыйын 9 күнүгэр түүн «Toyota Allion» массыына суоппара итирик туруктаах сылдьан, Хатас сэлиэнньэтин Каландарашвили уулуссатынан айаннаан иһэн, утары суолга тахсан 16 саастаах уол ыытан иһэр, учуокка турбатах матасыыкылын кытта харсыбыт.

Суол саахалын түмүгэр матасыыкыл ыытааччыта уонна 15 саастаах пассажир оҕо  тутатына миэстэтигэр өлбүттэр. Хаарчахтыыр миэрэ быһыытынан буруйдаах хаайылынна. Дакаастабыллары хомуйар сыалтан силиэстийэлиир дьайыылар ыытыллаллар.