Итирик туруктаах уруулга олорбут дьахтар сууттанна, массыыната былдьанна

Тохсунньу 21 күнүгэр Ленскэй оройуонун суута олохтоох дьахтар бириигэбэрин таһаарда.

Кини РФ Холуобунай кодексатын (ХК) 264.1 ыстатыйатын 1-кы чааһыгар көрүллүбүт буруйу оҥорбутунан буруйдааҕынан билинилиннэ (итирик туруктаах мэдиссиинэ туоһулааһыныттан ааһарга боломуочуйалаах дуоһунастаах сирэй сокуоннай ирдэбилин толорботоҕун иһин административнай накаастабылга тардыллыбыт, массыынаны итирик туруктаах салайбыт).

Суут быһаарбытынан, былырыын балаҕан ыйын 2 күнүгэр, киэһэ 23 чааска Ленскэй куоракка сууттанааччы дьахтар урут боломуочуйалаах дуоһунастаах сирэй итирик туруктааҕын бэрэбиэркэлиир сокуоннай ирдэбилин толорботоҕун иһин административнай эппиэтинэскэ тардыллыбытын үрдүнэн,  сөптөөх түмүгү оҥостубакка, иккиһин итирик туруктаах улуурга олорбут. Онон суолга  кутталы үөскэппит. Итирик дьахтар сокуону кэһэр дьайыыларын ДПС үлэһиттэрэ тохтоппуттар.

Суутунан буруйдаах дьахтар 200 000 солкуобайга ыстарааптанна уонна 2 сыл болдьоххо тырааныспары салайар бырааба быһылынна. РФ ХК 104.1 ыстатыйатын 1-кы чааһын «д» пуунугар сөп түбэһиннэрэн, дьахтар «HYUNDAI SOLARIS» мааркалаах массыыната судаарыстыба дохуотугар былдьанна. Бириигэбэр сокуоннай күүһүгэр киирэ илик диэн Саха Өрөспүүбүлүкэтин Сууттарын холбоһуктаах пресс-сулууспата суруйар.