Ититии 23 тыһыынча дьиэҕэ киирдэ

«ОДьКХ» ГУП  23 тыһыынча дьиэҕэ ититиини киллэрбит. Маны таһынан тыһыынчаттан тахса социальнай эбийиэктэр, олор истэригэр оскуолалар, балыыһалар, уһуйааннар, успуорт саалалара ититиигэ холбоммуттар.

Бу туһунан тэрилтэ генеральнай дириэктэрэ Виталий Чикачев брифинг кэмигэр иһитиннэрдэ.  Кини бэлиэтииринэн, аан бастаан итиини атырдьах ыйын 8 күнүгэр арктическай улуустарга киллэрбиттэр. Саамай бүтэһигин балаҕан ыйын 11 күнүгэр Өлүөхүмэ оройуонугар киллэрбиттэр.

«Тэрилтэбит өрөмүөннүүр үлэтин чэрчитинэн, бу сылга 50 км хаарбах туруктаах ситимнэр, 81 саҥа хочуол уонна 131 носуоснай-тяговой тэрил оҥоһуллуннулар», — диэн эттэ.

Тэрилтэ балаансатыгар билигин 630 хочуолунай баар. Балар бары кыһыны көрсөргө бэлэмнэр. Бу сылга түөрт саҥа хочуолунай үлэҕэ киириэхтээх.

Эбээн Бытантай Кустууругар, Чурапчы Хадаарыгар, Хаҥалас улууһун Кытыл Дьураатыгар саҥа хочуолунайдар үлэлэрин саҕалаабыттар. Сүрүн болҕомто кыһалҕалаах хочуолунайдарга ууруллар. Эдьигээҥҥэ  24 МВт кыамталаах хочуолунай реконструкцияламмыт, түөрт хочуол хапытаалынай өрөмүөнү ааспыт.