IV Норуоттар икки ардыларынааҕы библиографическай кэнгириэс ыытыллыаҕа

Балаҕан ыйын 16-19 күннэригэр Дьокуускай куоракка IV Норуоттар икки ардыларынааҕы библиографическай кэнгириэс буолуоҕа.

Кэнгириэс үлэлиир күннэригэр Саха сирин киин куоратыгар бибилэтиэкэ уопсастыбатын бастыҥ бэрэстэбиитэллэрэ, библиография эйгэтин эспиэрдэрэ, ону таһынан учуонайдар, кинигэни үөрэтээччилэр, программистар, таһаарааччылар мустан аныгы аан дойдуга библиография култуурунай нэһилиэстибэни уонна тыл эгэлгэтин харыстааһыҥҥа оруолун дьүүллэһиэхтэрэ.

Кэнгириэс кэмигэр 12 секция үлэлиэҕэ, кинилэр темалара библиография эйгэтигэр сытыытык турар боппуруостарга ананаллар. Секциялар тематикалара эмиэ култуурунай нэһилиэстибэ сүрүн быһыытынан кинигэ пааматынньыктарыгар уонна кинилэр аныгы уопсастыбаҕа оруолларыгар, ааҕыыны уонна кинигэни үөрэтиигэ дисциплиналар икки ардыларынааҕы сыһыаннарга, ол иһигэр билии араас эйгэлэригэр библиография дьайыытыгар, ыччакка уонна оҕолорго анаан бибилэтиэкэ пуондатын үөскэтии ньымаларыгар, квалификациялаах исписэлиистэри бэлэмнээһиҥҥэ уо.д.а. ананаллар.

Секциялар үлэлэрин таһынан, научнай бырагыраамаҕа «Виртуальнай иһитиннэрэр-библиографическай өҥө» уонна «Сыыппара үйэтигэр оҕо ааҕыыта: уларыйыы уонна сайдыы» тиэмэлээх төгүрүк остуоллар, «Бырайыактар болҕомто киинигэр: саҥа кыахтары көрдөөһүн» воркшоп, «Аһаҕас киириилээх ресурсаларга метаданнайдар: туһаныы кыахтара уонна кыһалҕалара» smart-сессия, трекиннэр, маастар-кылаастар уонна экскурсиялар киллэрилиннилэр. Научнай бырагырааманы дойду араас эрэгийиэннэриттэн биллиилээх-көстүүлээх исписэлиистэр салайыахтара.