Иван Боппосов хаар аттара

Таатта улууһун Уолба нэһилиэгин олохтооҕо Иван Боппосов дьиэтин үрдүгэр Уот кыһыл сылгы сылын көрсө хаар аттары оҥорон өрөспүүбүлүкэ дьонун-сэргэтин сэҥээриитин ылла.

Кини балбааҕынан сыл бэлиэлэрин оҥорор Михаил Боппосов бииргэ төрөөбүт быраата буолар.

“Хаарынан, мууһунан оҥоһуктары оҥорбутум уонча сыл буолла. Оҕом 1 кылааска киирэригэр саҕалаабытым, быйыл кини 11 кылаас үөрэнээччитэ”, — диир Иван Трофимович. – Быйыл дьиэм үрдүгэр түөрт сылгыны оҥордум. Кырыыһа хаара көмүрүөлэммэт, онон чиҥ буолан оҥорорго үчүгэй. Үчүгэйдик көстөрүн туһугар прожектор холбуур санаалаахпын”.

Ини-бии Боппоосоптор айар дьоҕурдара өссө арылла, дьону үөрдэ турарыгар баҕарабыт.