Иван Егоров – Горнай үбүлүөйдээх 90 сылыгар анаан

                                                                                                                                                                                           «Кэрэ сыал ииппитэ угуйан,
                                                                                                                                                                                           Киһилиэ баара дуо оҕону.
                                                                                                                                                                                           Билии киэҥ аартыгын арыйан
                                                                                                                                                                                           Мин айсыах тустааҕым олоҕу.
                                                                                                                                                                                           Элбэхтик сүүрэммин-көтөммүн,
                                                                                                                                                                                           Төннүөхтээх этим мин дойдубар,
                                                                                                                                                                                           Түү куорсун анньыммыт уйабар…»

(«Төнүннүм төрөөбүт дойдубар». Иван Горнай.)

Сүрэҕинэн көрөр поэт, публицист, тылбаасчыт, Саха Өрөспүүбүлүкэтин «Гражданскай килбиэн» бэлиэ кавалера, сахалартан бастакы тифлопедагог, көрбөттөргө аналлаах Брайль сириибин сахалыы алпабыытын ааптара, Иван Николаевич Егоров – Горнай үбүлүөйдээх 90 сылыгар анаммыт тэрээһиннэр чэрчилэринэн төрөөбүт сиригэр-уотугар Тыымпынайга өйдөбүнньүк бэлиэ турда.

Олохтоох дьаһалта үтүө дьыаланы көҕүлээн, поэт Иван Горнай аатын үйэтитиигэ үлэлэһэн, үбүлээн, ыраахтан чугастан кыттыылаахтары түмтэ. Солоҕон нэһилиэгин баһылыга Александра Александрова ыҥырыытынан Дьокуускайдааҕы коррекционнай оскуола учууталлара, «Үлэ күүһэ» эрэдээксийэ, киин бибилэтиэкэ үлэһиттэрэ, Иван Горнай аймахтара уонна Солоҕон нэһилиэгин көхтөөх олохтоохторо Сиинэ ытык сиригэр ыалдьыттаан, айылҕалыын алтыһан, холобур оҥостор, тумус туттар сүдү киһибитин үйэтитиигэ кыттыыны ыллыбыт.

Иван Николаевич – Иван Горнай олох очурдарын эрдээхтик туораан, орто дойдуга дьолу, үтүөнү түстээн, айар үлэнэн кынаттанан, олоххо дьулуурунан үгүс дьоҥҥо, эдэр ыччакка холобур буолар. Кини туохха да тэҥнэммэт биир сүҥкэн кылаата көрбөттөргө аналлаах сахалыы Брайль алпаабыты айбыта буолар. Бу алта туочука көмөтүнэн көрбөт дьон сахалыы ааҕар-суруйар кыахтаммыттара.

Иван Горнай үгүс айымньылара айылҕаны, төрүт дойдуну, олоҕу хоһуйуу буолаллар. Ол иһин буоллаҕа, улууһун аатын аат оҥостубут соҕотох суруйааччыбыт буолар. Иван Егоров 1958 с. Бэрдьигэстээх орто оскуолатын бастакынан кыһыл көмүс мэтээлинэн бүтэрбит, улууспут историятыгар киирбит дьаныардаах үөрэнээччи. Доруобуйатынан хааччахтааҕыттан толлон турбатах тифлопедагог, учуутал идэтин баһылаабыт, өрөспүүбүлүкэҕэ култуура уонна үөрэҕирии сайдыытыгар сүҥкэн кылаатын киллэрбит биир дойдулаахпыт.

Мария Павлова,

Бэрдьигэстээх, Горнай.

Ааптар хаартыскаларга түһэриитэ