Иван Гаврильев: «Аҕа дойдуну көмүскээччилэр дьиэ кэргэттэригэр бары кыахпытынан көмөлөһөбүт»

Байыаннай дьайыы кыттыылаахтара уонна кинилэр дьиэ кэргэттэрэ хаһааҥҥытааҕар даҕаны көмөҕө наадыйаллар – дьиэ-уот ис-тас кыһалҕатыгар, уйулҕа өттүнэн, гуманитарнай, юридическай көмөҕө наадыйыы элбэх.

Аҕалара, уолаттара, кэргэттэрэ, бырааттара быстах мобилизацияҕа түбэһэн барбыт үгүс дьиэ кэргэттэр тутаах дьонноро суох буолан, кыһарыйтараллара элбэх буоллаҕа. Онуоха биир дойдулаахтара күүс-көмө, илии-атах буолан көмөлөһөн абырыыллар.

Бүгүн өрөспүүбүлүкэ улуустарыгар байыаннай дьайыы кыттыылаахтарыгар уонна кинилэр дьиэ кэргэттэригэр хайдах-туох көмө оҥоһулларын туһунан Ньурба улууһун оройуоннааҕы сэбиэтин дьокутаата Иван Гаврильев кэпсиир:

— байыаннай дьайыы таарыйбатах ыала, аймаҕа диэн, арааһа, суоҕа буолуо. Барыта бэйэбит оҕолорбут Аҕа дойдуларын көмүскүү сылдьаллар, онон өрөспүүбүлүкэ өттүттэн араас көмө дьаһала ылыллан өйөбүл оҥоһуллар. Оттон биһиги улууспутун ойуччу ылан этэр буоллахха, хас биирдии нэһилиэккэ, куоракка араас хабааннаах көмө оҥоһуллар. Аҕа дойду Улуу сэриитигэ хас биирдии ыал эһээтэ, аҕата сэриигэ кыттыбыта, оттон ийэлэр, эбээлэр тыылга кыайыыны уһансыбыттара. Онон биһиги билигин даҕаны өйдүүбүт, маннык уустук балаһыанньаҕа биһиги бары бииргэ, оҕолорбутугар өйөбүл буолуохтаахпытын.

Улуус үрдүнэн Ил Дархан дьаһалын толорууга күүстээх үлэ барар, онуоха баһылыкпыт Алексей Иннокентьев көмө, өйөбүл оҥоһуллуутун бэйэтин тус хонтуруолугар тутар. Хас нэһилиэк аайы анал байыаннай дьайыы кыттыылааҕар, кинилэр дьиэ кэргэттэригэр көмө тиийэр. Уопсайынан, биир дойдулаахтарбыт кыһалҕалаахха уталыппакка көмөлөһөр үтүө үгэстээхтэр, былыргы сэбиэскэй патриоттуу иитии манна төһүү буолла. Холобур, мин уокурукпуттан икки киһи барбыта, биир уолбут, хомойуох иһин, сырдык тыына быстан, ийэ буоругар аҕалыллан кистэммитэ.

Госпиталга сытар уолаттарбытыгар чугас дьонноро көрсө баралларыгар-кэлэллэригэр ороскуоттарыгар көмөлөһөбүт. Уйулҕа көмөтө эмиэ тиһиктээхтик ыытыллар. Биһиги улууспутугар Ньурбатааҕы техникум уонна оскуолалар үөрэнээччилэрэ «Патриот» диэн хамсааһыннара байыаннай дьайыы кыттыылаахтарын дьиэ кэргэттэригэр дьиэ ис-тас үлэтигэр элбэхтик көмөлөһөллөр. Холобур, кыстык мастарын бэлэмнииргэ, киллэриигэ, хайытыыга, сааһылааһыҥҥа, саас тиэргэн уутун түһэрэргэ хоруу хаһыытыгар, муус ылыытыгар, киллэриитигэр, сайын тиэргэн отун охсуутугар, онтон даҕаны атын үлэни,  наада буолла даҕаны, толороллор.