Иван Иванов: «Саха сирин нэһилиэнньэтин доруобуйатын туһугар үлэлиэхпит»

-Ил Дархан Айсен Николаев Анал этиитигэр уопсастыба доруобуйатын харыстабылыгар уонна бөҕөргөтүүгэ болҕомто салгыы уурулларын туһунан эппитин олус кэрэхсээтим, – диэн Өрөспүүбүлүкэтээҕи 2 №-дээх балыыһа-Суһал мэдиссиинэ көмөтүн киинин кылаабынай бырааһа Иван Сергеевич Иванов санаатын үллэһиннэ.

-Биһиги балыыһабытыгар ыарахан ыарыыга ылларбыт дьон киирэллэр. Ыарыыны эрдэттэн сэрэтии уонна персонализированнай мэдиссиинэҕэ көһүү ыарахан түбэлтэлэри аҕыйатыаҕа. Дьон бэйэтин доруобуйата үксүгэр бэйэтиттэн тутулуктааҕын куруук өйдүөхтээх. Биһиги бэйэбитин төһө харыстыырбытыттан уонна, биллэн турар, онно төһө кыһалларбытыттан, чөл олоҕу тутуһарбытыттан тутулуктаах.
Ону сэргэ, доруобуйа харыстабылыгар тиэхиньиичэскэй сэбилэнии уонна сыыппараҕа көһүү соруктара тураллар. Биллэн турар, мэдиссиинэ үлэһиттэрин үлэлэрин усулуобуйатын тупсарыы үчүгэй түмүктэри аҕалыаҕа. Саха сирин нэһилиэнньэтин доруобуйатын туһугар үлэлиэхпит.