Иван Левин: «Социальнай эбийиэктэр тутуллан, тыаҕа дьон олоҕо сэргэхсийдэ»

Кэнники биэс сылга Саха сиригэр үөрэх, доруобуйа харыстабылын, култуура уонна успуорт эбийиэктэрин тутуу, ону тэҥэ хаарбах дьиэлэртэн дьону көһөрүү лаппа улааппыта бэлиэтэнэр. Үгүс тутуулар 2018 сыллаахха дойду үрдүнэн ылыллыбыт национальнай бырайыактары олоххо киллэрии бырагыраамаларынан ыытыллаллар.

Кэбээйи улууһугар национальнай бырайыактарынан элбэх социальнай эбийиэктэр тутуллаллар, өрөмүөннэнэллэр. Бүгүн нацбырайыактар хайдах олоххо киирэн иһэллэрин туһунан Кэбээйи улууһун баһылыга Иван Левин санаатын үллэстэр:

— Биһиги улууспут киин куораттан төһө ыраах да сыттар, уустук суоллааҕын-иистээҕин да иһин, аныгы олох тэтиминэн сайдар. Дойду Бэрэсидьиэнэ Владимир Путин көҕүлээбит национальнай бырайыактарынан элбэх социальнай эбийиэк тутуллан, тыа сирин олоҕо сэргэхсийдэ. Ол курдук «Үөрэхтээһин» нацбырайыагынан уонна олохтоох бүддьүөттэн үбүлээһин суотугар оскуолаларга, оҕо уһуйааннарыгар хапытаалынай өрөмүөн оҥоһуллубута. Сэбээн Күөл, Мастаах, Танара орто оскуолалара тырааныспарынан хааччылыннылар. Сайылык сэлиэнньэтигэр 275 оҕо үөрэнэригэр аналлаах оскуола тутуллан быйыл үлэҕэ киирээри турар. Оттон Кэбээйигэ 140 миэстэлээх оҕо уһуйаана тутулла турар, быйыл күһүн үлэҕэ киириэхтээх.

«Доруобуйа харыстабыла» нацбырайыагынан Сиэгэн Күөлгэ быраас амбулаторията, Тыайаҕа уонна Арыктаахха биэлсэр-акушер пууна тутуллан киирбиттэрэ. Мастаахха биэлсэр-акушер пуунугар, Кэбээйигэ быраас амбулаториятыгар, П.Д. Степанов аатынан Кэбээйитээҕи түмэлгэ  хапытаалынай өрөмүөннэр оҥоһуллубуттара. Култуура кииннэригэр саҥа оборудованиелар атыылаһыллыбыттара.

«Олорор дьиэ уонна куорат эйгэтэ» нацбырайыагынан Сангаар бөһүөлэгин иһинээҕи дьиэлэр тиэргэннэрин тупсарыы ыытыллар. Кэбээйи сэлиэнньэтигэр Култуура уонна сынньалаҥ киинэ тутуллан үлэҕэ киирдэ.

2019-2023 сс. улууска киин ититэр ситимҥэ 34 ыал дьиэтэ холбонно, 84 кыра дохуоттаах ыал биир кэмнээх материальнай көмө ыланнар дьиэлэрин гааска холбоотулар. Ону сэргэ Чагда, Батамай, Лүксүгүн сэлиэнньэлэригэр саҥа кыбартаалларга уот ситимэ тардыллар. Бу бырагырааманан Кэбээйи сэлиэнньэтигэр иһэргэ уонна хаһаайыстыбаҕа туттарга анаан сир аннынааҕы ууну көрдүүргэ үлэ барар.

Ити мин сүрүннэрин эрэ ааттаталаатым.  «Куттала суох, хаачыстыбалаах суоллар», «Демография», «Тырааныспар инфраструктуратын саҥардыы», «Экология», «Цифровой экэниэмикэ» национальнай бырайыактарынан үгүс үлэ барар.