Иван Стручков: “Барыласка от сиэмэтэ тоҥон хаалбыт курдук»

Дьааҥы улууһун Барылас нэһилиэгэр быйыл от үүнүүтэ мөлтөх буолуох курдук. Ол туһунан нэһилиэк баһылыга Иван Стручков биһиги саайтпытыгар иһитиннэрдэ.

— Оттуур ходуһаларбытын баран көрбүппүт. Быйыл саас олус курааннаата. Халлаан үчүгэйдик сылыйа илик буолан, от сиэмэтэ тоҥон хаалла дуу дии саныыбын. Биһиэхэ уонча ыал оттуоҕа. Уопсайа 50-чэ хороҕор муостаах, 200-чэ сыспай сиэллээх күөххэ этэҥҥэ үктэннэ. Барыластар куруук илиинэн оттуубут.