Иван Туприн табанан Красноярскай кыраайга Кыайыы Знамятын тириэртэ

Кулун тутар 28 күнүгэр Кыайыы Арктикатааҕы эстэпиэтэтин Саха сиринээҕи түһүмэҕэ түмүктэннэ. Анаабыртан Иван Туприн табанан Красноярскай кыраай Попигай бөһүөлэгэр Кыайыы знамятын тириэртэ.

“Кыайыы Арктикатааҕы эстэпиэтэтэ Аҕа дойду сэриитин сылларыгар хоту дойду олохтоохторо киллэрбит кылааттарыгар анананар. Бу олус суолталаах, Арассыыйа табаһыттарын национальнай сойууһа ыыппыт аахсыйатын табаһыттар чугастааҕы эрэгийиэҥҥэ тиэрдэллэр”, – диэн бырабыыталыстыба бэрэссэдээтэлин солбуйааччы  Ольга Балабкина этэр.

Попигай олохтоохторо Кыайыы Знамятын үөрүүлээх быһыыга-майгыга көрүстүлэр. Оттон Саха сириттэн аҕалбыт табаһыты дьиэтигэр атаардылар. Бу күн Хатанга бөһүөлэгин Арктикатааҕы култуура киинигэр эстэпиэтэни туттарыы тэрээһинэ буолла.

Кулун тутар 28 күнүттэн муус устар 1 күнүгэр диэри Кыайыы Знамятын Попигай, Новорыбная, Жданиха бөһүөлэктэрин уонна Хатанга сэлиэнньэтин олохтоохторо уруйдуу көрсүөхтэрэ.

Патриотическай аахсыйа Арассыыйатааҕы табаһыттар национальнай сойуустарын көҕүлээһининэн олоххо киирбитэ.

Ил Дархан уонна Бырабыыталыстыба пресс-сулууспата.

Хаартысканы Красноярскай кыраай Таймыр долган-национальнай автономнай уокуругун дьаһалтата тиксэрдэ.