Иван Борисов: «Саҥа уларыйыылартан олус үөрэбит»

РФ бэрэсидьиэнэ Владимир Путин көҕүлээбит «Доруобуйа харыстабыла» национальнай бырайыагынан Саха сиригэр доруобуйа харыстабылын саҥаттан саҥа эбийиэктэрэ тутулуннулар. Кэнники биэс сылга Перинатальнай, Кардиология кииннэрэ аһылыннылар.

Бэҕэһээ, олунньу 2 күнүгэр Онкология киинин аана үөрүүлээх быһыыга-майгыга аһылынна.

Онколог-хирург Иван Борисов диспансер кэлэктиибэ өр күүппүт саҥа дьиэлэрэ аһыллар күнэ үүммүтүттэн олус үөрэллэрин туһунан эттэ.

«Саҥа кииҥҥэ эмтэнээччилэргэ уонна үлэһиттэргэ олус үчүгэй усулуобуйа тэрилиннэ. Биһиги бу уларыйыылартан олус үөрэбит. Уруккуну кытары тэҥнээтэххэ, сир уонна халлаан курдук. Кэлэктиип маннык тэриллэрдээх усулуобуйаҕа үлэлиириттэн сүргэтэ көтөҕүллэн сылдьар.
Саҥа киин үлэҕэ киирдэҕинэ, эрэгийиэн онкология үрдүк технологиялаах эпэрээссийэтигэр наадыйыытын барытын толуйуохпут», -– диэн Иван Борисов үөрэн-көтөн туран кэпсээтэ.