Ивановскай олохтооҕо налоговай инспектор буолан кубулунан сууттанна

Дьокуускайга 4 мөл.солк. харчыны сымыйанан налоговай бэрэбиэркэ ыытабыт диэн уора сыспыттар. Суут Ивановскай уобалас 39 саастаах олохтооҕун 3,5 сылга көҥүлүн быһар туһунан бириигэбэри таһаарда диэн СӨ Борокуратуурата иһитиннэрэр.

Бу киһи эмсэҕэлээччиттэн 4 мөл.солк. харчыны налоговай бэрэбиэркэни ыытарга уонна декларацияны оҥорорго наада диэн ыла сатаабыт. Эр киһини кытта түөкүттэр быраабы араҥаччылыыр уорганнар уонна нолуок сулууспатын үлэһиттэрин аатыттан 2025 сыл ыам ыйын 29 күнүттэн бэс ыйын 7 күнүгэр диэри суруйсубуттар.

Сууттанааччы Дьокуускайга Санкт-Петербургтан көтөн кэлэн, бэс ыйын 7 күнүгэр эмсэҕэлээччи дьиэтигэр тиийбит. Налоговай инспекторбын диэн, аҕам саастаах киһиттэн докумуоннары ыла сатаабыт. Кинини онно полиция үлэһиттэрэ туппуттар.

Эр киһини 3 сыл 6 ыйга көҥүлүн быһар туһунан бириигэбэр таҕыста.