«Йошка Еш – 2025»: Саха сиригэр куоластаа!

Бу сыл атырдьах ыйын 16-17 күннэригэр Саха сирэ Марий Эл Өрөспүүбүлүкэтигэр ыытыллар III Эрэгийиэннэр икки ардыларынааҕы «Йошка Еш» бэстибээлгэ кыттыаҕа.

Быйыл тэрээһин саҥа сиргэ – Медведевскай ипподромҥа бүтүн дойдуттан мустубут рекорднай ахсааннаах кыттааччылардаах ыытыллар.

Уһук Илинтэн Арктикаҕа диэри 12 эрэгийиэнтэн 50-тан тахса пуобар уонна бастыҥ гастрономическай бырайыак ааптардара бэстибээл былаһааккатыгар Марий Эл Өрөспүүбүлүкэтин Бырабыыталыстыбатын уонна «Арассыыйа гастрономическай хаартата» федеральнай бырайыак өйөбүллэринэн кытталлар.

Бу сыллааҕы бэстибээл менютугар Арассыыйа элбэх омуктаах аһын-үөлүн 200-тэн тахса ураты аһа уонна утаҕа киирэр.

«Саха сирэ „Йошка Еш“ бэстибээл курдук киэҥ далааһыннаах гастрономическай тэрээһиҥҥэ кыттыыта – бу биһиги норуоппут национальнай аһын-үөлүн харыстааһыҥҥа уонна киэҥник тарҕатыыга олус суолталаах кылаат. Бу саха норуотун үгэстэрин баайын, ураты ырысыаптарын уонна култууратын туспатын киэҥ эйгэҕэ көрдөрөр ураты кыах буолар. Саха сирин национальнай аһа-үөлэ биһиги өбүгэлэрбит үйэлээх устуоруйаларын, айылҕаларын араастарын уонна олохторун-дьаһахтарын көрдөрөр. Олохтоох бородуукталартан бэлэмнэммит астар дириҥ ис хоһоонноохтор уонна көлүөнэттэн көлүөнэҕэ бэриллэр ураты эниэргийэлээхтэр. Ас-үөл  эти-сиини эрэ тоторбокко, куту сылааһынан уонна төрөөбүт дойду ахтылҕанынан толороллор», – диэн саха аһылыгын флагманын «Тыгын Дархан» бренд-шефэ Николай Атласов бэлиэтээтэ.

Быйыл бэстибээл икки күн устата барар. «Биһиги ыалдьыттарбыт Арассыыйа аһылыгын, Арассыыйа норуоттарын астарын иһин харчынан эрэ буолбакка, куоластыахтара диэн эрэнэбин. Быйыл бары сөбүлээбит астарын иһин саҥардыллыбыт «Арассыыйа гастрономическай хаартата» сыһыарыыга «Куоластаа» диэн саҥа функциянан куоластыыр кыахтаахтар. Арассыыйаҕа 200 тыһыынчаттан тахса аһылык тэрилтэтэ баар, өскөтүн бары – кафелартан уонна эрэстэрээннэртэн саҕалаан, бэлэм аһы тиэрдиигэ тиийэ холбоотоххо.

Арассыыйа норуоттарын астарынан идэтийэр сирдэр ахсааннара билиҥҥэ диэри 1%-тан тахсыбат. Куоластааһын быраабылата олус судургу: сөбүлээтиҥ – куоластаа, сөбүлээбэтиҥ – куоластаама. Арассыыйа аһыгар-үөлүгэр кыһаллар бары дьоҥҥо кыттыыгыт иһин махтанабыт. Биһиэхэ аспыт туһунан саамай сүрүн санаа – бу биһиги ыалдьыттарбыт, биһиги норуоппут санаата», – диэн «Арассыыйа гастрономическай хаартата» бырайыак ааптара Екатерина Шаповалова эттэ.

Хайдах куоластыыбыт?

• Сыһыарыыны бу сигэнэн хачайдыыбыт: https://taplink.cc/gastrokarta?from=qr (сыһыарыыга QR-куодтаах постер баар).
• Куоластааһыҥҥа көһөргө экраан аллараа өттүгэр баар навигация панелынан туһанан «сүрэх» ойуулаах ГОЛОСУЙ! диэн бэлиэни баттааҥ.
• ГОЛОСУЙ! салааҕа «ЙОШКА ЕШ» – 2025 диэн куоластааһын категориятыгар киириҥ.
• Бэстибээл сөбүлээбит кыттааччыларгыт иһин куоластааҥ.
• Пуобардар хаартыскаларын баттаан, «Кухни народов России» / «Русская кухня» менютугар киириҥ, онно сөбүлээбит аскыт-үөлгүт уонна утаххыт иһин куоластыаххытын сөп.

Бары куоластар түмүллэллэр уонна автоматическайдык ылаллар. Өскөтүн эһиги сөбүлээбэтэххитинэ уонна санааҕытын ыытыаххытын баҕардаххытына, МОЙ АККАУНТ диэҥҥэ киирэн «Оставить отзыв» салааҕа суруйуҥ.