Йошкар-Олаҕа “Илиир Хоруолу” иһийэн олорон көрдүлэр

Сэтинньи 14 күнүгэр Былатыан Ойуунускай аатынан Саха тыйаатыра 120-с айар дьылын чэрчитинэн, Волга өрүс кытылыгар турар куораттарынан гостуруола саҕаланна.

“Улахан гостуруоллар” федеральнай бырагыраама чэрчитинэн ыытыллар гостуруоллар Марий Эл Өрөспүүбүлүкэтин Йошкар-Ола куоратыттан саҕаланнылар.

Бэҕэһээ, сэтинньи 14 күнүгэр Саха тыйаатырын артыыстара М. Шкетан аатынан Марийскай дыраама тыйаатырын сыанатыгар Арассыыйа норуодунай артыыһа, биллиилээх режиссер Андрей Борисов туруоруутугар улуу Шекспир өлбөт-сүппэт айымньытынан “Илиир Хоруол” испэктээкили көрдөрдүлэр.

Испэктээкил иннинэ Саха тыйаатырын дьоно көрөөччүлэри сахалыы сиэринэн алгыстаах алаадьынан көрүстүлэр, кыл быаҕа салама баайтардылар.

Марий Эл Өрөспүүбүлүкэтин култуураҕа миниистирин бэчээт уонна төрүт омуктар дьыалаларыгар солбуйааччы Михаил Матвеев:
“Түөрт төгүл “Кыһыл көмүс мааска” театральнай бириэмийэ лауреатын аатын ылбыт, аан дойдуну тилийэ кэрийбит Саха академическэй тыйаатырын улахан гостуруолун биһиги куораппытыттан саҕалаабыта биһиэхэ улахан суолталаах” – диэн бэлиэтээтэ.

Саха тыйаатырын дириэктэрэ, СӨ үтүөлээх артыыһа Петр Макаров М.Шкетан аатынан Марийскай дыраама тыйаатырын дириэктэрэ Эрик Юзыкайнҥа Арассыыйа норуоттарын доҕордоһууларын кэрэһэлиир Саха тыйаатырын гостуруолларын өйдүү-саныы сылдьалларыгар тойон чороону туттарда.

Тохтобул кэмигэр Саха тыйаатырын дьоно испэктээкил көрө кэлбит Йошкар-Ола олохтоохторугар уонна ыалдьыттарыгар норуоппут төрүт оонньууларын кытары билсиһиннэрэн, хабылыгы, хаамысканы оонньоттулар, итиэннэ саха төрүт астарын амсаттылар.

Судаарыстыбаннай бириэмийэ лауреата буолбут “Илиир Хоруол” испэктээкил толору саала көрөөччүнү муста. Саха сириттэн кэлэн Татарстан, Марий Эл куораттарыгар олорор биир дойдулаахтарбыт төрөөбүт тылларынан испэктээкил көрөн үөрэн, долгуйан бардылар. Оттон Саха тыйаатырын кытары аан маҥнай билсиһэр көрөөччүлэр иһийэн, болҕойон олорон көрдүлэр.

Михаил Васютин Марий Эл Өрөспүүбүлүкэтин Судаарыстыбаннай Мунньаҕын бэрэссэдээтэлэ:
— Элбэх норуот сомоҕолоһон олорор киэҥ нэлэмэн Арассыыйа национальнай тыйаатырдарыттан биир ытыктанар кырдьаҕас тыйаатыр ыраах Саха сириттэн биһиэхэ гостуруоллуу кэлбитэ улахан суолталаах. Биһиги өрөспүүбүлүкэбит нэһилиэнньэтэ тыйаатыры таптыыр, онон саха эпоһын — Олоҥхону, Арассыыйаҕа эрэ буолбакка, тас дойдуларга кытары бэйэтин аатын ааттаппыт Саха тыйаатырын уонна уус-уран салайааччыгытын Андрей Саввич Борисовы истэбит, билэбит. “Король Лир” испэктээкили финно-угорскай тыллардаах тыйаатырдар элбэхтэ туруорбуттара, оттон бүгүн саха төрүт тылынан оонньонор испэктээкил – култуура хааччахтамматын, ускуустуба муҥура суоҕун өссө биирдэ бигэргэттэ. Норуот бэйэтин култууратын, тыйаатыр ускуустубатын нөҥүө төрөөбүт тылынан хайа баҕарар омукка тиэрдиэн сөп диэн көрдөрдө.

Ольга Боролина, Йошкар-Ола куорат Г. Константинов аатынан Нуучча акадеческай дыраама тыйаатырын көстүүмҥэ худуоһунньуга:
— Артыыстар оонньуулара улаханнык сөхтөрдө. Ордук Шут оруолун бэлиэтиэхпин баҕарабын. Шут ураты сөҕүмэр сатабыллаах оонньуутун сөбүлээтим, кини муударай өйдөөх даҕаны бэйэтин көмүскэнэр кыаҕа суох, ол эрэн туох эрэ дьикти улахан күүстээх, ол миигин умсугутта. Көстүүмнэри наһаа сөбүлээтим, бэйэм көстүүм худуоһунньуга буоларым быһыытынан, артыыстар тугу таҥнан сыанаҕа тахсалларыгар улахан болҕомтобун уурабын. Бу испэктээкил көстүүмнэрэ олус үчүгэйдэр. Уопсайынан, “Илиир Хоруолга” барытын сөбүлээтим уонна бу испэктээкили көрбүппүттэн олус үөрдүм.

Андрей, Марина Павловтар, Сунтаартан төрүттээх биир дойдулаахтарбыт:

— Биһиги Нижний Новгород куоракка олорбуппут бэһис сыла. Оҕолорбутун кытары дьиэ кэргэнинэн Чебоксары уонна Йошкар-Ола куораттарынан күүлэйдии сылдьабыт. Манна кэлэн Саха тыйаатыра гостуруоллуу кэлэр диэн биллэриини көрөн, наһаа үөрбүппүт уонна хайаан да сылдьабыт диэн кэллибит. Төрөөбүт дойдубутугар олорон, хомойуох иһин, Саха тыйаатырыгар биирдэ да сылдьыбатахпыт. Бүгүн дьэ, оҥостон испэктээкили көрүөхпүт. Сахабыт сиригэр сыл аайы барабыт, ол да буоллар син биир дойдубутун күүскэ ахтабыт. Тыйаатырга кэлэн биир дойдулаахтарбытын көрсөн, алгыс ылан, алаадьы амсайан олус астынныбыт, Ыһыахха сылдьар курдук саннанныбыт.

Бүгүн киэһэ Йошкар-Ола куоракка Саха тыйаатырын гостуруолун Сергей Потапов туруоруутугар Михаил Булгаков “Маастар уонна Маргарита” испэктээкилэ түмүктүөҕэ.

Саха тыйаатырын пресс-сулууспата