“Каадырдар” национальнай бырайыакка эрэл улахан

Ньурба улууһун Антоновка сэлиэнньэтигэр (Октябрьскай нэһилиэк)  СӨ Бырабыыталыстыбатын 2024 сыллааҕы үлэтин отчуоттуур мунньахха бу күннэргэ улууска отчуоттаабыт үс бөлөх толору састаабынан үлэлээтэ.

Ситэриилээх былаас отчуота антоновкалар биир киэн туттар саҥа эбийиэктэрэ – сотору толору аһыллан үлэтин саҕалыахтаах Александра Овчинникова аатынан “Түһүлгэ” норуот айымньытын дьиэтигэр ыытылынна. Дириэктэр Матрена Прокопьевна Захарова   саҥа дьиэ ис бараанын билиһиннэрдэ.

Антоновка олохтоохторо  сүрүннээн «Сунтаар-Ньурба» үрдүк күүрүүлээх уот лиинийэтин туругун, уот сыанатын,  хочуолунайы тутуу, каадырынан хааччыллыы, эдэр исписэлиистэри  олохсутан үлэлэтии, Бүлүү водохранилищетыгар экологическай мониторинг төһө ыытылларын, улууска сиртэн-хостонор баайы хостуур төһө тэрилтэ баарын,  өрөспүүбүлүкэҕэ олохтоох аһынан-үөлүнэн хааччыллыы туһунан уо.д.а. боппуруостары ыйыталастылар.

Олохтоохтор Ньурба улууһугар саҥа оскуола тутуллубатаҕа ырааппытын (2012 с.)  бэлиэтээн эттилэр.  150 миэстэлээх «Ромашка» оҕо уһуйаанын тутуу  улууска алмаастан киирэр үп суотугар саҕаланара, быйыл бырайыага оҥоһуллара былааннанар. 288  миэстэлээх начаалынай оскуолаҕа эбии тутуу бырайыагар куонкурус биллэриллибит. Манна даҕатан,  учууталлар тиийбэттэрин, урукку курдук эдэр учууталлар үөрэҕи бүтэрэллэригэр тоҕо чопчу биир сиргэ ананан, 5 сыл болдьохтоон үлэлээбэттэрин ыйыталастылар. Онуоха СӨ Бырабыыталыстыбатын бэрэссэдээтэлин солбуйааччы, Ньурбаҕа отчуоттуур оробуочай бөлөх салайааччыта Георгий Михайлович  Степанов үөрэҕи бүтэрбит исписэлиистэри  үлэҕэ чопчу анааһын 1990-с сыллартан тохтообутун, үлэҕэ булгуччулаахтык анааһын сүрүн  сокуон ирдэбилигэр эппиэттээбэтин, билигин “Каадырдар” диэн саҥа федеральнай  национальнай бырайыак олоххо киирбитин, өрөспүүбүлүкэ үөрэҕин кыһалара чахчы үлэнэн хааччыллыахтаах дьон ахсаанын ааҕан-суохтаан үлэлиэхтээхтэрин туһунан эттэ. Ньурба улууһун кытыы сытар Хатыы нэһилиэгэ учууталларынан 100 бырыһыан хааччыллан олорорун холобурдаата. Онон, сэбиэскэй ньыманы төнүннэрэр кыах суоҕунан, түөлбэлэри, дьаһалтаны, оскуоланы кытары бииргэ үлэлээн,  атын ньымалары тобулуу уонна олоххо киллэрии ирдэнэр.

Отчуоттуур мунньахха барыта 102 киһи кытынна, 6 киһи тус кэпсэтиигэ сырытта. Мунньах кыттыылаахтара СӨ ситэриилээх былааһын отчуотун биһирииллэрин биллэрдилэр.