СҮБЭҺИТ: Кабачуоктан биэс ырысыап
Бу күннэргэ, атырдьах ыйын саҕаланыыта кабачуок ситэн-хотон, “кабачуоктааххыт дуо? Бэрсэбин дуо?” уонна “буорту буола илигинэ сии охсуохха” диэн этиилэр оҕуруоттаах ыал аайы иһиллэр буолуохтаахтар. Кабачуогу сатаан үүннэрдэххэ, олус элбэх аһы биэрэр. Онон, хаһаайкалар дьоҥҥо бэрсэр, араастаан астыы сатыыр буолуохтаахтар.
“Саха сирэ” хаһыат кабачуоктан астаныллар биэс ураты ырысыабы түмтэ. Боруобалааҥ, дьиэ кэргэҥҥитин күндүлээҥ. Минньигэстик аһааҥ!
Пицца
Биһиэхэ наада:
— 2 орто соҕус кабачуок;
— 1 сымыыт;
— 5 ост. нь. бурдук;
— туус, хара биэрэс;
— 50 г ынах арыыта;
— 2 ост. нь. панировочнай суухара;
— буспут куурусса этэ эбэтэр халбаһы;
— 1 помидор;
— 100 г сыыр;
— укуруоп, петрушка, күөх луук.
Хайдах бэлэмниибит: кабачуоктары сууйабыт уонна теркалыыбыт. Кыратык туустуубут, булкуйабыт. Күүтэ түһэн баран тахсыбыт уутун ыгабыт. Бу маассаҕа бурдугу, панировочнай суухараны, сымыыты уонна кыра гына быһыллыбыт укуруобу, петрушканы, күөх луугу кутан булкуйабыт. Туустуубут, биэрэстиибит.
Салгыы тиэстэбитин ынах арыытынан сыбаммыт духуопка илииһигэр кутабыт. Тэҥ гына тарҕатабыт, быһа холоон 1 см халыҥнаах буолуохтаах. Тиэстэ үрдүгэр куурусса этин эбэтэр халбаһыны, помидору чараас гына бысталаан уурабыт. Үрдүгэр сыыры теркалаан кутабыт уонна 180 °C кыраадыска духуопкаҕа 30 мүнүүтэ буһарабыт.
Сокууска
Биһиэхэ наада:
— 2 орто соҕус кабачуок;
— 3 ост. нь. панировочнай суухара;
— оливковай арыы;
— 2 чусунуок тииһэ;
— туус, тума.
Хайдах бэлэмниибит: кабачуогу хахтыыбыт уонна 1 см халыҥнаах гына буруустуу бысталыыбыт. Оливковай арыыга туус, тума кутан булкуйабыт, онно кабачуоктарбытын 20 мүнүүтэ кэриҥэ сытыара түһэбит.
Салгыы кабачуоктары ылан панировочнай суухараҕа эргитэбит. Духуопка илииһигэр пергамент кумааҕыны тэлгэтэн, онно “буруустарбытын” ууртылыыбыт. 200 °C кыраадыска тиийэ сылыйбыт духуопкаҕа 15–20 мүнүүтэ кабачоктарбыт саһарыахтарыгар диэри буһарабыт.
Туорт
Биһиэхэ наада:
— 1 улахан кабачуок;
— 1 ч. нь. туус;
— 3 ост. нь. мааннай куруппа;
— 2 сымыыт;
— үүнээйи арыыта;
— 1 эриэппэ луук;
— 1 моркуоп;
— 2 чусунуок тииһэ;
— 200 г майонез эбэтэр эбилигэ суох йогурт;
— укуруоп.
Хайдах бэлэмниибит: кабачуогу сууйабыт, сиэмэтин ылҕаан ылан быраҕабыт уонна теркалыыбыт. Кыратык туустаан, 15 мүнүүтэ туруора түһэбит. Онтон теркаламмыт кабачуокпут уутун ыгабыт, бурдук, мааннай куруппа, сымыыт кутан барытын булкуйабыт. Табыллыбыт тиэстэттэн биэс-алта билиниини ыһаарылыыбыт.
Салгыы луугу уонна моркуобу бытархай гына бысталыыбыт уонна арыыга ыһаарылыыбыт. Сымнаабытын кэнниттэн чусунуок ыган кутабыт, укуруоп
булкуйабыт.
Туорпутун хомуйабыт: хас биирдии билиниини майонеһынан эбэтэр йогуртунан сыбыыбыт. Үрүт-үрдүгэр уура-уура хас хаттыгас аайы ыһаарыламмыт луугу, моркуобу кутабыт. Туорпут үрдүн теркаламмыт сыырынан, укуруобунан киэргэтэбит.
Фитнес-чипсы
Биһиэхэ наада:
— 1 кабачуок;
— 2 чусунуок тииһэ;
— туус, тума;
— оливковай арыы.
Хайдах бэлэмниибит: иһиккэ арыыны кытта ыгыллыбыт чусунуогу, тууһу, туманы булкуйан суос оҥоробут. Кабачуогу чараас гына бысталыыбыт уонна соуска уган ыла-ыла, духуопка илииһигэр пергамент кумааҕыны тэлгэтэн баран ууратыылыбыт. Духуопканы кыра температураҕа туруоран, 10–13 чаас устата чипсыбытын куурдабыт.
Кекс
Биһиэхэ наада:
— 1 кабачуок;
— 220 г саахар;
— 0,5 ч. нь. суода;
— 1 ч. нь. разрыхлитель;
— 2 сымыыт;
— 5 ост. нь. какао-бороһуок;
— 120 г сүөгэй;
— 50 г ынах арыыта;
— 100 мл үүнээйи арыыта;
— 200 г бурдук.
Хайдах бэлэмниибит: кабачуогу сиэмэтиттэн ыраастыыбыт, теркалыыбыт эбэтэр блендэргэ эрийтэрэбит. Туустуубут, уутун ыгабыт. Онно сымыыты, саахары, ууллубут ынах арыытын, үүнээйи арыытын кутан булкуйабыт.
Салгыы атын иһиккэ бурдугу, суоданы, разрыхлители уонна какао-бороһуогу кутан булкуйабыт. Кабачуоктаах маассаны бурдуктаах маассаҕа кутабыт. Табыллыбыт тиэстэни пуормаларга кутан, 180 °C кыраадыска духуопкаҕа 45 мүнүүтэ буһарабыт.
Баҕарар буоллаххытына, тиэстэҕэ корицаны, ванильнай саахары кутуоххутун сөп. Оччотугар кекс өссө минньигэс буолуоҕа. Духуопкаттан саҥа буһан тахсыбыт кекстэри пуорматтан хостуурга тиэтэйимэҥ. Биэс мүнүүтэ кэриҥэ сойута түһүҥ, кекс үрдүн сакалаатынан, саахар пуударатынан киэргэтиэххэ сөп.
Сообщить об опечатке
Текст, который будет отправлен нашим редакторам: