Камчаткаҕа улахан сир хамсааһына буолла

От ыйын 30 күнүгэр Камчаткаҕа кэнники 70 сылга саамай улахан сир хамсааһына буолла. Магнитудата муҥутаан  8,7 баалга тэҥнэстэ. Бу сир хамсааһыныттан цунами (улахан долгун) кэлиэ диэн куттанан, кытылтан дьону көһөрдүлэр. 

Сир хамсааһына Чуумпу акыйааҥҥа, Петропавловскай-Камчатскайтан 143 килэмиэтир ыраах буолла. Бу маннык күүстээх сир хамсааһына бүтэһигин 1952 сыллаахха буолбут эбит. Билигин да кыра хамсааһыннар буола тураллар.

Гидрометеорологияҕа уонна тулалыыр эйгэни кэтээн көрүүгэ управление Водопаднай хомоҕо 3-4 миэтэрэ үрдүктээх цунами долгуну бэлиэтээтэ. Хотугу Курильскай куоракка цунами кэлэн, порду уонна «Алаид» балыктыыр тэрилтэ сирин тимиртэ. Элэктэриичистибэ уота араҕыста. Эмсэҕэлээбит киһи суох.

Курильскай арыыларга эмиэ сир хамсааһына, улахан долгун кэлиитин куттала баар. Дьоппуоннар эмиэ сэрэхэчийэн олороллор. 3 миэтэрэ үрдүктээх долгун кэлиэ диэн сэрэппиттэрэ. Премьер «Миниистир Сигэру Исиба Хоккайдо арыы олохтоохторун куттал ааһыар диэри дьону элбэх этээстээх дьиэлэргэ баран олоруҥ диэн сэрэттэ. Муораны, акыйааны кэтээн көрөллөр. Атомнай ыстаансыйаларга куттал суоһаабат диэн этэллэр.

Петропавловскай-Камчатскай куоракка сорох дьиэлэр алдьаннылар. Өрөмүөннэнэ турбут 15 №-дээх оҕо уһуйаанын биир истиэнэтэ суулунна. Аэропортка биир дьахтар эмсэҕэлээтэ, туруга этэҥҥэ. Элэктэриичистибэ уота, интэриниэт, суотабай сибээс арахса сырыттылар эрээри, сотору кэминэн холбоотулар. Авиахампаанньалар рейстэри тохтоттулар.

Билигин хоромньуну ааҕаллар. Цунами эмискэ кэлиэн сөп, онон ыксаллаах балаһыанньа эрэсиимэ оннунан хаалар.

Санатар буоллахха, соторутааҕыта Нерюнгри оройуонугар 4-5 бааллаах сир хамсааһына буолбута.