Андрей Сорокин хаартыскаҕа түһэриитэ, СИА
Үөрэх тэрилтэлэрин уонна научнай кииннэри — Дьокуускайга үрдүк үөрэхтэр кампустара түмүө. Ол туһунан СӨ Ил Дархана Айсен Николаев эбийиэги тэрийиигэ анаммыт стратегическай сиэссийэҕэ иһитиннэрдэ.
Манна ХИФУ, Арктикатааҕы судаарыстыбаннай агротехнологическай университет, Арктикатааҕы култуура уонна искусство института, СӨ Наукаларын академията, РНА СО Саха сиринээҕи научнай киинэ уонна «Север» Научнай-үөрэтэр киин түмсүөхтэрэ диэн этиллэр. Маннык түмсүү өрөспүүбүлүкэҕэ наука, үөрэх уонна технология сайдыытыгар сүҥкэн баазаны тэрийиинэн буолара бэлиэтэнэр.
Кини этэринэн, кампус талааннаах дьону тардыаҕа, саҥа идиэйэлэри, толкуйдары, быһаарыылары күүһүрдүө. Бырайыак Саха сирин бигэ сайдыытыгар уонна дойду, норуоттар икки ардыларынааҕы уопсастыбалар олохторугар көхтөөх кыттыыны ыларга дьоһун хардыынан буолуоҕа.
—Кампус бу саҥа куорпуһу тутуу эрэ буолбатах, бу өрөспүүбүлүкэ инники кэскилигэр суолталаах. Биһиги наука, үөрэҕирии, биисинэс түмсэр холбоһуктаах сирдэрин тэрийэбит. Бу каадырдары бэлэмнииргэ, сыалы-соругу быһаарарга уонна саҥа кыахтары арыйар туһугар, — диэн этэр Айсен Николаев.
Бырайыак сүрүн сыала — тыйыс килиимэттээх сиргэ эрэгийиэн түргэнник сайдарыгар көмөлөһүү. Кампус устудьуоннарга уонна эдэр исписэлиистэргэ энэргиэтикэттэн саҕалаан Арктика олоҕор саҥа технологиялары оҥорон таһаарыыга тиийэ кыаҕы биэриэ. Аныгы лабораториялары, үөрэнэр кылаастары таһынан, стартаптары, научнай чинчийиилэри уонна биисинэһи кытары бииргэ үлэлэһэр кыахтар эмиэ баар буолуохтара.
Маны сэргэ, экологияҕа, Хотугу норуоттар үгэстэрин харыстааһыҥҥа уонна култуураны, киинэни, дизайны, IT, уо.д.а. креативнай индустрияны сайыннарарга улахан болҕомто ууруллуо. Бу норуоттар икки ардыларынааҕы таһымҥа тахсарга тиийэ саҥа кэскиллээх суоллары арыйыа.
Кампуһу Дьокуускай 68 түөлбэтигэр туталлар. Бэлиэтииллэринэн 10,5 га иэннээх, уопсай иэнэ 132 ты. кв.м. буолара былааннанар.
2026 сылга бырайыактыыр-симиэтэ докумуонун бэлэмниир былааннаахтар, 2027 сылтан үлэ саҕаланыа диэн этэллэр.
Санатар буоллахха, РФ Бэрэсидьиэнэ аан дойду таһымнаах 40-тан итэҕэһэ суох үрдүк үөрэхтэр кампустарын ситимин тэрийэри соруйбута. Кампус бырайыагын Ил Дархан Айсен Николаев РФ Бэрэсидьиэнэ В.Путин Саха сиригэр үлэтинэн кэлэ сырыттаҕына билиһиннэрбитэ.
Сиһилии https://www.sakha.gov.ru/news/front/view/id/3491388 манна ааҕыҥ.
СӨ Ил Дарханын уонна Бырабыыталыстыбатын пресс-сулууспата
Андрей Сорокин хаартыскаларга түһэриитэ, СИА
Саха Өрөспүүбүлүкэтин суут бириистэптэрин сулууспатын управлениетыгар икки сааһын ситэ илик оҕотун иитиитигэр алименнары төлөөбөтөх дьахтар…
Кэнники кэмҥэ дьон куораттан, улуустар кииннэриттэн тыа сиригэр көһөн тахсар буолла. Кинилэр үгүстэрэ маннык быһаарыныыны…
Субуота — Сатурн планета салайар күнэ. Онон бу күн ыксааһыны сөбүлээбэт. Бүгүн саҕаламмыт дьыала уһун…
Ахсынньы 19 күнүгэр сарсыарда Аллараа Бэстээх уонна Төҥүлү икки ардынааҕы суолга дьон өлүүлээх суол быһылаана…
Бүгүн, ахсынньы 20 күнүгэр, Дьокуускай куорат оскуолаларын үөрэнээччилэригэр актированнай күн биллэрилиннэ. Бу туһунан Дьокуускай куорат…
Саха сирин синоптиктарын сабаҕалааһыннарынан бүгүн, ахсынньы 20 күнүгэр хоту хаардыыр, Арктика кытылынан уонна Халымаҕа хаар…