Капитоновка сэлиэнньэтин чугас арыыга киһи өлүгэ булулунна

Ыам ыйын 19 күнүгэр сарсыарда 08.35  чааска Дьокуускай куорат Капитоновка сэлиэнньэтин чугас арыыга икки булчут бултуу тахсыбыттарын туһунан иһитиннэрии киирбит. Кэлин биирдэстэрэ өлбүтүн туһунан быһылаан тахсыбыта регистрацияламмыт.

Силиэстийэ быһаарбытынан, икки булчут арыыга бултуу тахсан баран,  хас биирдиилэрэ тыыга хонуктаан хааларга быһаарыммыттар. Сарсыарда уһуктан тураат, булчут табаарыһа ууга тимирбит өлүгүн булбутун туһунан полицияҕа тыллаабыт.

Быыһааччылар баһаарынай сулууспа дьуһуурунай сменатын састаабыгар быһылаан тахсыбыт сиригэр тиийэннэр, киһи өлүгүн ууттан хостообуттар уонна  СӨ Силиэстийэлиир кэмитиэт үлэһиттэригэр туттардылар.  Иккис булчуту кытта силиэстийэ ыытыллар. Эр киһи өлүүтүн төрүөтүн туһааннаах исписэлиистэр быһаарыахтара.

Саха сиринээҕи быыһыыр сулууспа балыксыттарга уонна булчуттарга санатар: Өрүскэ муус барар кэмигэр арыыларга сылдьыыттан туттунуҥ! Кыра суудуналар хаһаайыттара өрүскэ муус устар кэмигэр, навигация официальнайдык аһыллыар диэри, уу эбиийиэктэригэр тахсаллара бобуулаах.

«112» — суһал сулууспа биир кэлим нүөмэрэ. +7 (4112) 45-90-19 — СӨ Быыһыыр суһал сулууспатын төлөпүөнэ.