Карина Ефимова — РФ успуордун маастара

Дьокуускайтан Карина Ефимова өрөспүүбүлүкэҕэ биир бастакынан дзюдоҕа норуоттар икки ардыларынааҕы кылаастаах РФ успуордун маастарынан буолла.

Бу бирикээһи РФ успуордун миниистирэ Михаил Дегтярев илии баттаата. Ол туһунан «Триумф» пресс-сулууспата иһитиннэрэр. Кыыс 21 сааһыгар номнуо дьахталлар ортолоругар аан дойду чөмпүйүөнэ, Арассыыйа первенстволарын бары саастарыгар призера, күүстээх спортсменнар спартакиадатын, «Russian judo tour» турнир, ону тэҥэ Европа Куубагын кыайыылааҕа.

«Бу биһиги спортсменкабыт уонна дзюдоҕа Саха сирин сүүмэрдэммит хамаандатын өр сыллаах үлэтин түмүгэ. Маныаха кыыс салгыы аан дойду улахан түһүлгэлэригэр кыайыыларынан үөрдэ-көтүтэ туруоҕа диэн эрэнэбит», — диэн иһитиннэриигэ этиллэр.