Хаартыска: СИА.
Казахстаҥҥа оҕо төрөөтөҕүнэ, Национальнай пуондаттан дуолларынан харчы биэрэр буоллулар (Дубайга курдук). Бу төлөбүрү 2024 сыл тохсунньутуттан ыла сыл аайы, оҕо 18 сааһын туолуор диэри биэриэхтэрэ. Пуонда инвестиционнай дохуотуттан көрөн, бу төлөбүр улаатыан, уларыйыан сөп. Бу туһунан үп вице-миниистирэ Даурен Темирбеков иһитиннэрдэ.
— Бу көҕүлээһини бэрэсидьиэн Касым-Жомарт Токаев киллэрбитэ. Кини Национальнай пуонда инвестиционнай дохуотун 50%-нын оҕолорго түҥэтэргэ быһаарбыта. Онон бу бырагыраамаҕа кыттар оҕо сыллата 150-200 дуоллары ылан, 18 сааһын туоларыгар ортотунан 3600-4000 кэриҥэ дуоллар мунньуллуохтаах. Инвестиционнай дохуот үрдүк буоллаҕына, бу суума эмиэ үрдүөн, эбэтэр, көҕүрүөн сөп, — диэн кини эттэ.
Токаев бу иннинэ Казахстаҥҥа Оҕо сылын биллэрэн турар. Кини этэринэн, дойду национальнай баайыттан хас биирдии дьиэ кэргэн туһаныахтаах. Ол эрээри, төрөппүттэр оҕо 18 сааһыгар диэри харчыны устар кыахтара суох. Оҕо сокуоннай сааһын туолбутун кэннэ, үөрэнэригэр, эбэтэр, дьиэ атыылаһарыгар бу харчытын ыытыан сөп.
2021 сыллаахха Национальнай пуонда инвестиционнай дохуота 4,2 миллиард дуолларга тэҥнэспитэ. Биэрэпис дааннайдарынан, бу сылга Казахстаҥҥа 0-17 саастаах 6 325 950 оҕо баара.
Маны тэҥэ, Казахстаҥҥа оҕо төрөөтөҕүнэ, биирдэ бэриллэр төлөбүр ананар. Үлэлиир да, үлэлээбэт да дьахталларга барыларыгар бэриллэр. Кээмэйэ: бастакы, иккис, үһүс оҕоҕо — 131 100 тенге, төрдүс оҕоҕо — 217 350 тенге (1 тенге – 0,17 солкуобай).
Санатар буоллахха, Арассыыйаҕа 2007 сылтан саҥа төрөөбүт иккис оҕоҕо, 2019 сылтан бастакы оҕоҕо Ийэ хапытаала төлөнөр. Суумата – бастакы оҕоҕо 587 тыһыынча солкуобай, иккис уонна онтон кэлэр оҕоҕо – 775 тыһыынча солкуобай (10 472 дуоллар).
Хантан кэлбитэ, ким айбыта биллибэт эрээри, Саҥа дьыл бэйэтэ туспа үгэстээх, биттээх-билгэлээх. Сорох дьон маны…
Ахсынньы 22 күнүгэр алыптаах Саҥа дьыл бырааһынньыгын көрсө, А.Е.Кулаковскай аатынан Норуоттар доҕордоһууларын дьиэтигэр «Саҥа дьыллааҕы…
Мииринэй куоракка борокуратуура 820 тыһ. солк. суумалаах арыгынан суокуоннай суохтук эргиниинэн холуобунай дьыаланы суукка ыытта.…
Анал байыаннай дьайыы кыттыылаахтара уонна кинилэргэ тэҥнээх дьон иккис орто үөрэххэ босхо үөрэнэр кыахтаахтар. Судаарыстыба…
Ааспыкка Саҥа дьылааҕы сандалы солбуллубат олохтооҕо буолбут "саҕынньахтаах селедка" салаат оннугар рулет оҥорору сэргээбиккит. Аны…
Индия, табылыннаҕына, сыл бүтүөр диэри Арассыыйа туристическай бөлөхтөрүгэр визата суох эрэсиими олохтуон сөп диэн Индия…