РФ бэрэсидьиэнин пресс-сулууспата
Казахстаҥҥа от ыйын 3-4 күннэригэр Шанхайдааҕы бииргэ үлэлэһии түмсүүтүн сэбиэтин мунньаҕа саҕаланна. Дойдубут Аҕа баһылыга Владимир Путин бэҕэһээ мунньах чэрчитинэн дойдулар салайааччыларын кытары көрүстэ.
Мунньах түмүгүнэн дойдулар салайааччылара Астанатааҕы декларацияҕа уонна да атын туһааннаах докумуоннарга илии баттаһыахтара.
Владимир Путин от ыйын 3 күнүгэр Монголия, Азербайджан, Пакистан, Турция, Кытай уонна Казахстан салайааччыларын кытары көрүстэ. Монголия бэрэсидьиэнин Ухнаагийн Хурэлсуҕу кытары көрсүһүүтүгэр быйыл Халкин-Гол өрүскэ кыайыы олохтоммута 85 сыла туоларын, Арассыыйа уонна Монголия икки ардыгар табаары эргинии быйыл лаппа эбиллибитин, сылын аайы дойдубутугар Монголияттан устудьуоннар үөрэххэ киириилэрэ эбиллэ турарын бэлиэтээтэ. Ону таһынан энергетикаҕа, тырааныспар, суол-иис эйгэтигэр бииргэ үлэлэһии кэҥээн иһэрин эттэ.
Азербайджан бэрэсидьиэнин Ильхам Алиевы кытары “Хоту-соҕуруу” трасса тутуутун, энергетика, экэниэмикэ боппуруостарын, Азербайджаҥҥа нуучча тылын үөрэтии туһунан кэпсэттилэр. Санатан эттэххэ, Ильхам Алиев биир ый анараа өттүгэр Москваҕа командировкаҕа кэлэн барбыта.
Оттон Пакистан премьер-миниистирин Шехбаз Шарифы кытары Владимир Путин икки сыллааҕыта көрсүбүтэ. Бу кэпсэтиилэригэр энергетика уонна тыа хаһаайыстыбатын бородууксуйатын боппуруостарын туруордулар.
Владимир Путин Турция уонна Кытай салайааччыларын кытары көрсүһүүлэрин аан дойду барыта кэтээн көрөр. Бу сырыыга Владимир Владимирович Реджеп Тайип Эрдоганы кытары атомнай станция тутуутун, энергетика боппуруостарын, чуолаан “Боташ” уонна “Газпром” хампаанньалар гааһы тиэрдиигэ баттаспыт докумуоннарын, туһунан кэпсэттилэр. Ону таһынан туризм эйгэтин эмиэ ырыттылар.
Оттон Си Цзиньпины кытары көрсүһүүтүгэр Арассыыйа уонна Кытай култуураларын сылларын ыытыы хайдах баран иһэрин, дойдуларга куттал суох буолуутун хааччыйыы, Шанхайдааҕы бииргэ үлэлэһии түмсүүтүгэр Белоруссия киириитин, атыы-эргиэн боппуруостарын көрдүлэр.
Казахстан бэрэсидьиэнин Касым-Жомарт Токаевы кытары кэпсэтиитигэр Владимир Путин Арассыыйа уонна Казахстан быйыл икки өттүнэн хас да аан дойдутааҕы таһымнаах түмсүүлэргэ бэрэссэдээтэллииллэрин, сылтан сыл табаары эргиниилэрэ эбиллэн иһэрин тоһоҕолоон бэлиэтээтэ.
Ю.П. Степанов аатынан инбэлииттэри чөлүгэр түһэрэр өрөспүүбүлүкэтээҕи кииҥҥэ 557 байыаннай дьайыы кыттыылааҕа уонна кинилэр дьиэ…
Аны сайын Кэбээйи улууһугар Олоҥхо ыһыаҕа ыытыллар. Ону көрсө Сииттэ оскуолатын таһыгар төрөппүттэр оҕолорун кытта…
Абый улууһун борокуруора оскуолаҕа уруокка эт-хаан эчэйиитин ылбыт оҕоҕо харчынан толуйууну төлөттө. 2014 сыллаахха төрөөбүт…
Сунтаар улууһугар ахсынньы 24 күнүгэр «Абаҕа» спортивнай комплекска хабылыкка уонна хаамыскаҕа 5-11 кылаас үөрэнээччилэригэр күрэхтэһии …
2025 сыл ахсынньы 28 күнүгэр олохтоох бириэмэнэн 22:18 чааска "Восточнай" космодромтан "Союз-2.1б" аракыата көтөрө былааннанар.…
Ил Дархан Айсен Николаев өрөспүүбүлүкэ парламеныгар туһаайыытыгар судаарыстыбаннай сиэктэр тиһигин үлэтин 1,5 төгүл түргэтэтэргэ сорудахтаата.…