Казань куоракка «Олонхо – вечное эхо Евразии» национальнай эпоһы билиһиннэрдилэр

Саха сириттэн үс тыйаатыр Галиаскар Камал аатынан Татаар судаарыстыбаннай академическай тыйаатырын сыанатыгар «Олонхо – вечное эхо Евразии»  национальнай эпоһы көрдөрдө.

Саха сирин дьоно Олоҥхо тыйаатырын «Удаҕаннар» олоҥхо-испэктээгин уонна «Олонхо – вечное эхо Евразии» тыйаатыр туруоруутун билиһиннэрдилэр. Саха Өрөспүүбүлүкэтин Култуураҕа уонна духуобунай сайдыыга миниистирэ Афанасий Ноев туруоруу ситиһиилээхтик ааспытын бэлиэтээтэ.

«Биһиги кыратык долгуйдубут. Олоҥхону Татарстан сыанатыгар аан бастаан көрдөрөбүт. Ол эрээри көрөөччүлэр ылыммыттара сөҕүмэр этэ», — диэтэ миниистир. Билиһиннэриигэ Афанасий Ноев быйыл Саха сирэ саха героическай эпоһа «Олоҥхо» киһи аймах материальнайа суох култуурунай нэһилиэстибэтин бастыҥ айымньытынан билиниллибитин 20 сылын уонна саха норуодунай ырыаһыта, олоҥхоһут, саха сценаҕа үҥкүүтүн култууратын төрүттээччи Сергей Афанасьевич Зверев – Кыыл Уола төрөөбүтэ 125 сылын бэлиэтиирин  эттэ.

«Быйыл Олоҥхо билиһиннэриитин Татарстан Өрөспүүбүлүкэтигэр ыытыы ураты бэлиэ. Бу күннэргэ С.А. Зверев аатынан Үҥкүү национальнай тыйаатыра уонна П.А. Ойуунускай аатынан Саха академическай тыйаатыра «РОСКОНЦЕРТ» ФГБУК «Улахан гастроллар» уонна «Биһиги – Арассыыйа» федеральнай бырагыраамаларын өйөбүлүнэн ыытыллар гастролларын чэрчитинэн Казань куоракка сылдьаллар», — диэн Афанасий Ноев эбэн эттэ. Билиһиннэрии Яна Ньургусова олоҥхону толоруутуттан саҕаланна, оттон тэрээһин Айсен Федоров этиитинэн түмүктэннэ.

«Быйылгы сылга ыытыллыбыт Сабантуй бырааһынньыга, бырааттыы татаар норуотун култуурата Саха сирин олохтоохторун байытта. Дьокуускайга 25-с Федеральнай Сабантуй ыытыллыыта икки өрөспүүбүлүкэ доҕордуу ситимин бөҕөргөттө уонна Татарстан уонна Саха сирин эргиэн-экэнэмиичэскэй, гуманитарнай ситимнэрин бөҕөргөтүүгэ сайдыы саҥа кыахтарын аста. Ити туоһутунан биһиги үс тыйаатырбыт бу күннэргэ Поволжье эрэгийиэннэринэн улахан гастроллара буолар. Оттон бүгүн биһиги үс тыйаатырбыт кэлэктииптэрэ, Арассыыйа норуодунай артыыһа, аныгы кэм уһулуччулаах режиссера Андрей Саввич Борисов салайааччылаах, Арассыыйа норуотун национальнай баайын-дуолун, саха норуотун духуобунай баайын, аан дойду уус-уран уонна материальнайа суох нэһилиэстибэтин бастыҥ айымньытын – олоҥхону көрдөрдүлэр. Олоҥхо эйгэтэ – биһиги тылбыт, култуурабыт, устуоруйабыт, олохпут философиябыт, Хотугу киһи духуобунаһа», — диэн Афанасий Ноев түмүктээтэ.

Олоҥхону билиһиннэрии чэрчитинэн Татарстан норуоттарын Доҕордоһууларын дьиэтигэр биир дойдулаахтары кытта көрүсүһүү буолла. Онно дэлэгээссийэни Казааннааҕы култуура университетын ректора Роза Ахмадиева истиҥник эҕэрдэлээтэ. Татарстаҥҥа 270 култуурунай холбоһук үлэлиир, онтон 40-на Татарстан норуоттарын Ассамблеятын састаабыгар киирэллэр. Бу холбоһуктар национальнай эпостары үөрэтиинэн, харыстааһынынан уонна тарҕатыынан көхтөөхтүк дьарыктаналлар. Саха норуотун ураты нэһилиэстибэтин – олоҥхо эпоһын билиһиннэрии норуоттар икки ардыларынааҕы сибээстэри бөҕөргөтөргө уонна Саха сирин төрүт үгэстэрин тарҕатарга көмөлөһөр суолталаах култуурунай тэрээһининэн буолла.