Казаннааҕы искибиэр уонна Муса Джалильга анаммыт пааматынньык — норуоттар сомоҕолоһууларын бэлиэтэ

Бүгүн Дьокуускай киинигэр саҥа тутууну — Казаннааҕы искибиэри астылар.

Искибиэр ортотугар татаар улуу бэйиэтэ,  буойун, Сэбиэскэй Сойуус Дьоруойа Муса Джалильга анаммыт бюст турда.

Суолталаах тэрээһиҥҥэ өрөспүүбүлүкэ салалтата уонна  Татарстан өрөспүүбүлүкэтин премьер-миниистирин солбуйааччы, татаардар аан дойдутааҕы кэнгириэстэрин национальнай сэбиэтин салайааччыта Василь Шайхразиев салайар официальнай дэлэгээссийэтэ кыттыыны ыллылар.

Казаннааҕы искибиэри тутууну икки өрөспүүбүлүкэ салалтата 2022 сыллаахха быһаарбыта. Ол сыл сайыныгар Саха сиригэр Татарстан күннэрин ыытыынан сибээстээн, өрөспүүбүлүкэ бэрэсидьиэнэ Рустам Минниханов кыттыылаах бастакы мэҥэ таас ууруллубута. Уонна олох кылгас  кэм иһигэр искибиэр тутуллан үлэҕэ киирдэ. Бу туһунан Василь Шайхразиев искибиэр аһыллыытыгар бэлиэтээн туран, татаар норуотун киэн туттар уола Муса Джалиль Арассыыйа олохтоохторугар барыларыгар устуоруйа холобурунан буоларын эттэ. — Дьокуускай куорат саамай килбэйэр киинигэр бэртээхэй искибиэри тутан олоххо киллэрбиккитигэр махтанабыт.

Бу искибиэр куорат олохтоохторун сөбүлээн сынньанар сирдэринэн, араас суолталаах тэрээһиннэри ыытар киининэн буоллун, — диэн баҕа санаатын тиэртэ Василь Шайхразиев.

Бырабыыталыстыба бэрэссэдээтэлин солбуйааччы Сергей Местников дэлэгээссийэ былырыын кэлэ сылдьан Саха сирин култууратын дириҥник үөрэппитин уонна икки бырааттыы өрөспүүбүүлүкэлэр салайааччылара — СӨ Ил Дархана Айсен Николаев уонна Татарстан Өрөспүүбүлүкэтин Бэрэсидьиэнэ  Рустам Минниханов бииргэ үлэлээһиҥҥэ сөбүлэсиһии түһэрсибиттэрин туһунан иһитиннэрдэ. «Бу сөбүлэсиһиигэ олоҕуран араас хайысхалаах үлэ ыытыллан эрэр. Ол онтон биирэ — балтараа сыл икки ардыгар Казаннааҕы искибиэр тутуллан үлэҕэ киирдэ», — диэн бэлиэтээтэ Сергей Местников.

Ил Түмэн Мунньах бэрэсэдээтэлин солбуйааччы Александр Жирков «бу искибиэр икки бырааттыы норуокка сомоҕолоһуу тирэҕинэн буолуоҕа» диэн бэлиэтээн туран, бу идиэйэни толкуйдаабыт дьоҥҥо махталын биллэрдэ.

Искибиэр үлэҕэ кииритин туһунан СӨ култуураҕа уонна духуобунаска миниистирэ Афанасий Ноев санаатын маннык үллэһиннэ:

«Туган Як» татаардар уопсастыбаннай түмсүүлэрин салайааччытын култуураҕа солбуйааччыта Тахир Хуснутдинов суолталаах тэрээһин туһунан бэркэ үөрэн туран, бэйэтин санаатын маннык тиэртэ:

Пааматынньыкка икки бырааттыы өрөспүүбүлүкэ уопсастыбаннаһа сибэкки дьөрбөтүн уурда:

Тэрээһин түмүгэр Татарстан өрөспүүбүлүкэтин премьер-миниистирин солбуйааччы Василь Шайхразиев суруналыыстары кытта кэпсэтиитигэр 2025 сылга Дьокуускай куоракка татаардар сабантуйдара ыытылларын уонна бары тэрээһиннэр бу Казаннааҕы искибиэртэн саҕаланыахтарын туһунан иһитиннэрдэ:

Искибиэр аһыллыытыгар Саха сирин уопсастыбаннаһа санаатын атастаста, бырааттыы норуоттар сомоҕолоһууларын айхаллаата.