Кэбээйи оройуонун олохтоохторо массыынаны уоран барбыттарын иһин ыстараап төлүөхтэрэ

Кэбээйи улууһун суутун уурааҕынан оройуон биир нэһилиэгин олохтоохторо РФ Холуобунай кодексатын 166 ыстатыйатын 2 чааһын «а» пуунунан (бөлөҕүнэн сылдьан, эрдэттэн соруммакка, массыынаны уоруу) көрүллүбүт буруйу оҥорууга буруйдаахтарынан билиниллэн ыстараап ананна. Бу туһунан СӨ сууттарын холбоһуктаах пресс-сулууспата иһитиннэрэр.

Суут быһаарбытынан, 56 уонна 19 саастаах икки эр киһи түүн чугас нэһиликкэ арыгылыы сылдьан, бэйэлэрин массыыналара суолга батыллан хаалбыт буолан, атын киһи чааһынай гарааһыгар киирэргэ быһаарыммыттар.

Онно кинилэр нэһилиэк иһигэр көҥүлэ суох массыынаны ылан сүүрдэр санаа киирбит. Буруйдаахтар бэйэлэрин икки ардыларыгар оруолларын үллэстибиттэр уонна атын киһи баайын тыытар бырааптара суоҕун өйдөөн туран, сокуоннайа суох  илдьэ барарга санаммыттар.

Суукка кинилэр буруйдарын билиммиттэр, ол эрээри Арассыыйа Федерациятын Конституциятын 51 ыстатыйатын туһанан көрдөрүү биэрэртэн аккаастаммыттар.

Буруйдаахтар буруйдара кинилэр бэйэлэрэ билиниилэринэн, туоһулар көрдөрүүлэринэн уонна буруйдааччы өттүнэн суукка бэриллибит атын даҕаны дакаастабылынан бигэргэммит.

Суут «бөлөҕүнэн сылдьан киксэн баран буруйу оҥорбуттара» толору дакаастаммытын, буруйу оҥорбуттарын бигэргэппит.

Буруйдаахтар тустарыгар буруйдарын чэпчэтэр уонна ыаратар биричиинэлэр суохтарынан, эрдэ сууттана сылдьыбатахтарын учуоттаан – суут хас биирдии буруйданааччыга 80 000 солкуобай ыстараабы судаарыстыба дохуотугар төлүүргэ уураахтаата.

Суут уурааҕа сокуоннай күүһүгэр киирэ илик.