Кэбээйи «Сайылыгын» арыыта ураты минньигэс

Кэбээйи улууһун Мукучу нэһилиэгин «Сайылык» кэпэрэтиибин үлэһиттэрэ сүөһү ахсаанын элбэтэн, ынах үүтүттэн оҥоһуллар бородууксуйа кээмэйин улаатыннарарга сорунан үлэлииллэр.

Бүгүҥҥү күҥҥэ хаһаайыстыба сүөһүтүн ахсаана — 248 төбө, онтон ыанар ынаҕа — 108. Сайын устата үлэһиттэр 106 туонна  үүтү ыан, 2650 киилэ арыыны бэлэмнээтилэр.  Сүмэһиннээх оттоох алаастарынан, хонууларынан мэччийэн ыанньыйбыт хороҕор муостаахтарын үүтүттэн оҥоһуллубут «Сайылык» ТХПК арыыта ураты минньигэс буолан, ыраахтан-чугастаан сакаастан ылаллар.