Кэбээйи улууһугар оҕо сайдыытын киинэ аһылынна

Быйылгы сылга диэри Кэбээйи нэһилиэгэр оскуола иннинээҕи саастаах оҕону иитэн-үөрэтэн таһаарар үс уһуйаан үлэлээн кэлбитэ.

Онтон улуустааҕы дьаһалта 2024 сыл бэс ыйын 25 күнүнээҕи 67-П уларытан тэрийии уурааҕар олоҕуран, 2024 сыл балаҕан ыйын 4 күнүгэр 12-с №-дээх «Кэскил», 13 №-дээх «Кустук» уонна 14 №-дээх «Сардаана» оҕо уһуйааннара холбоспуттарын түмүгэр, улууска оскуола иннинээҕи саастаах оҕолору иитэр бастакы «Оҕо сайдыытын киинэ –   «Мичээр» муниципальнай бюджетнай үөрэх тэрилтэтэ тэрилиннэ.

Оҕо сайдыытын киинин сэбиэдиссэйин эбээһинэһин толорооччунан СӨ үөрэхтээһин ситимин туйгуна Мотрена Иннокентьевна Новгородова ананна.

Бу саҥа аһыллыбыт 2024-2025 үөрэх дьылыгар оҕо сайдыытын киинэ 69 үлэһиттээх. Кииҥҥэ барыта 103 оҕо сылдьар. 2 бөлөххө кыра саастаахтар, 2 бөлөххө орто саастаахтар, 2 бөлөххө улахан саастаах оҕолор уонна 1 бөлөххө оҕолору оскуолаҕа бэлэмниир бөлөх үлэлии тураллар.

Оҕо сайдыытын киинин сүрүн соругунан оскуолаҕа киириэн иннинээҕи саастаах оҕолору сүрүн үөрэхтээһин бырагырааматыгар олоҕуран, өй-санаа, эт-хаан, уус-уран-кэрэни кэрэхсиир өттүнэн сайыннарыы буолар. Сүрүн болҕомто оҕо сайдыытыгар  ууруллар.

Саҥа тутулла турар уһуйаан дьиэтэ үлэҕэ киириэр диэри оҕо сайдыытын киинэ быйылгы үөрэх дьылыгар урукку дьиэлэригэр үлэлииллэр.

Татьяна Максимова-Лазарева.