Кэбээйи улууһун Арыктаах нэһилиэгин оскуолатыгар «Точка роста» үөрэх киинэ аһылынна

“Үөрэхтээһин” национальнай бырайыак “Аныгы оскуола” федеральнай бырайыагын чэрчитинэн Арыктаах  оскуолатыгар «Точка роста» естественнэй-билим хайысхалаах үөрэх киинэ аһылынна.

Киин аһыллыбытынан учууталларга уонна үөрэнээччилэргэ СӨ үөрэҕириитин миниистирин солбуйааччы Алевтина Аргунова видео-эҕэрдэтин тиэртэ. СӨ үөрэҕин туйгуна Рита Васильевна Ноговицына, эдэр педагог Сардаана Владимировна Ноговицына уонна оҕо бэйэтин салайыныытын бэрэсидьиэнэ Лидия Ноговицына бырааһынньык лиэнтэтин кырыйан, Үөрэх киинин арыйдылар.

«Точка роста» үөрэх киинэ икки кэбиниэттээх, онно «Физика», «Химия», «Биология» биридимиэттэригэр үөрэх бырагырааматын таһынан эбии үөрэтии, уруогу таһынан үлэ ыытыллара былааннанар.

Билим лабаратыарыйаларыгар физика учуутала Рита Васильевна уонна биология учуутала Сардаана Владимировна үөрэнээччилэрин кытта «физика» уонна «биология» биридимиэттэргэ сыыппара лабаратыарыйаларын туһанан уопуттары оҥорон көрдөрдүлэр.

Саҥа арыллыбыт киин биһиги оскуолабыт оҕолоро хаачыстыбалаах аныгы үөрэҕи ылар кыахтарын быдан улаатыннарыа.

Арыктаах сүрүн оскуолата