Кэбээйи улууһун идэлээх сойууһун чилиэннэрин “Бастыҥ тиэргэн” куонкурустара түмүктэннэ

Тиэргэннэрин, дьиэлэрин сибэккинэн симиир, киэргэтэр хаһаайыттар ханна баҕарар аҕыйаҕа суохтар.

Үөрэх үлэһиттэрин Кэбээйи улууһунааҕы идэлээх сойуустаах тэрилтэлэрин актива тиэргэни киэргэтиигэ куонкурус биллэрбитэ. “Бастыҥ тиэргэн” куонкуруска идэлээх сойуус  чилиэннэрэ ким баҕарар кыттар кыахтааҕа, ирдэбилэ – хаһаайка дьиэтин, тиэргэнин киэргэтиигэ төһө айымньылаахтык сыһыаннаспыта, үүнээйи, сибэкки элбэҕэ, дьиэ тупсаҕай тас көстүүтэ хаартыскаҕа түһэриллэн дьүүллүүр сүбэҕэ киириэхтээҕэ.

“Куонкуруска 13 сайаапка киирбитэ. Дьиҥэр бу олох аҕыйах, биһиэхэ тиэргэннэрин наһаа үчүгэйдик киэргэтэр олус элбэх ыал баар, олор кыттыбатахтара хомолтолоох, үчүгэй күөн күрэстэһии буолуохтаах этэ”, — диир үөрэх үлэһиттэрин улуустааҕы Идэлээх сойуустар тэрилтэлэрин бэрэссэдээтэлэ, хамыыһыйа бэрэссэдээтэлэ Ирина Андреева. — Кыттааччы аҕыйах да буоллар, хамыыһыйа бастыҥнары таларга балачча ыарырҕаппыта. Профком чилиэттэрин фантазиятыгар ымсыырыахха эрэ сөп. Ол да буоллар кыайыылаахтары уонна анал аат хаһаайыттарын быһаардыбыт”.

Кыайыылаахтарынан Кэбээйи орто оскуолатын саха тылын учуутала Марина Ивановна Егорова уонна Кэбээйи сэл. “Мичээр” уһуйаан кыладыапсыга Раиса Тихоновна Дьяконова буоллулар. 1 миэстэни Куокуй орто оскуолатын саха тылын учуутала С.И. Васильева, Кэбээйи орто оскуолатын физкултуура учуутала Дьяконова К.Е уонна Кэбээйи оскуолатын география учуутала А.С. Эверстова ыллылар. 2 миэстэҕэ Сииттэ оскуолатын алын кылаастарын учуутала А.Н. Дьяконова, Кэбээйи оскуолатын нуучча тылын учуутала А.Н. Капитонова, Батамай оскуолатын эбии үөрэхтээһиҥҥэ педагога О.Е. Чемезова таҕыстылар. Оттон “Мичээр” уһуйаан иитээччилэрэ Т.Д. Максимова, Л.К. Попова уонна Сииттэ оскуолатын муусука учуутала А.Г. Степанова 3 миэстэ буоллулар.

Куонкурус түмүгүнэн “Эстетическое и креативное оформление” анал аат Кэбээйи оскуолатын учуутала А.С. Эверстоваҕа, “Творческий подход” анал аат “Мичээр” уһуйаан иитээччитэ Н.Е. Винокуроваҕа, “Лучшее оформление фасада” – Сииттэ оскуолатын учуутала Л.К. Поповаҕа туттарылыннылар.

Ирина Васильевна уонна хамыыһыйа чилиэннэрэ бары кыттааччыларга махталларын тиэрдэллэр, кыттааччылар бары харчынан уонна дьупулуомунан наҕараадаланнылар.

Татьяна Максимова-Лазарева.