Кэбээйигэ 15 саастаах кыыс билэр киһитин төлөпүөнүттэн үс ый устата харчы уорбута билиннэ

Кэбээйи улууһун суута 15 саастаах буруйдаах кыыска бириигэбэрин таһаарда. Кини РФ Холуобунай Кодексатын 158-с ыстатыйатын 3-с чааһын «г» пуунунан баан счетуттан харчы уоруутун үс түбэлтэтигэр буруйдааҕынан ааҕылынна.

Суут быһаарыытынан кыыс оҕо 3 сыл 6 ыйга болдьоххо көҥүлэ быһылынна, онтон 1 сыл 6 ый болдьоҕо усулуобунайдык ананна. Суут быһаарбытынан, былырыын кыыс үс ый устата тус барыс ылаары, кистээн, билэр киһитин төлөпүөнүн туһанан «мобильнай баан» өҥөтүнэн счетуттан бэйэтин счетугар харчы ыыта сылдьыбыт.

Буруйдаах кыыс дьайыыларын түмүгэр эмсэҕэлээччигэ 23 тыһ. солк. кээмэйдээх  хоромньу оҥоһуллубут. Суут кэмигэр сокуоннай сааһын ситэ илик сууттанааччы буруйун толору билиммит, ол эрээри РФ Конституциятын 51-с ыстатыйатынан көрүллүбүт быраабынан туһанан, быһаарыы биэрэртэн аккаастаммыт.

Суут кыыс сокуоннай сааһын ситэ илигин учуоттаан, эмсэҕэлээччи өттүттэн ирдэбил суоҕунан усулуобунайдык болдьоҕун быһарга уураахтаата. Суут бириигэбэрэ сокуоннай күүһүгэр киирдэ.