Кэбээйигэ нэһилиэк баһылыгын боломуочуйатын болдьоҕун иннинэ тохтоттулар

Кэбээйи улууһун суута быһаарбытынан, «Ламыҥха эбээн национальнай нэһилиэгэ» баһылыга чааһынай урбаанньытынан буолар кэргэнинээн ас-үөл аҕалыыга дуогабар түһэрсэн, бүддьүөттэн харчы  ороскуоттаабыт, ону таһынан 91 тыһ. солк. тахса уопсай суумалаах грант субсидиятын анаабыт.

Грант үбэ-харчыта уонна дуогабар кини тус интэриэһинэн, коррупцияны утары сокуону кэһиинэн түһэрсиллибит. Онон борокуратуура нэһилиэк баһылыгын боломуочуйатын итэҕэли сүтэрбитинэн болдьоҕун иннинэ тохтотор туһунан уонна борокуруор этиитин аккаастаабыт нэһилиэк дьокутааттарын Сэбиэтин быһаарыытын сокуоннайа суоҕунан билинэр туһунан суут көрүүтүгэр докумуон киллэрбит.

Суут борокуратуура ирдэбилин толорбут. Суут быһаарыыта сокуоннай күүһүгэр киирэ илик диэн СӨ борокуратуурата иһитиннэрэр.