Кэбээйигэ сокуону кэһэн сир арендаламмыт дуогабары тохтоттулар

Кэбээйи улууһун борокуратууратын ирдэбилинэн сир учаастагын арендаламмыт сокуоннайа суох дуогабар тохтотулунна. Бу туһунан СӨ Борокуратууратын пресс-сулууспата иһитиннэрэр.

Надзордуур уорган быһаарбытынан, улуус дьаһалтата кэммиэрчэскэй тэрилтэҕэ «тыа хаһаайыстыбатыгар туһаныы» диэн көрүҥүнэн көҥүллэммит сири куонкурус ыыппакка эрэ биэрбит.

Кэлин учаастак  «ыскылааттары туруоруу» диэҥҥэ уларытыллыбыт. Онуоха судаарыстыбаннай реестиргэ бу тэрилтэ тыа хаһаайыстыбатын тэрилтэлэригэр киирэрин туһунан сибидиэнньэ суох эбит, онон сокуону кэһии тахсыбыта бэлиэтэммит. Булуллубут кэһиилэри туоратар сыалтан Кэбээйи улууһун борокуратуурата муниципальнай тэриллии дьаһалтатын баһылыгар ирдэбил киллэрдэ. Ол курдук, аренда дуогабара тохтотулунна, оттон учаастак муниципалитет бас билиитигэр төннөрүлүннэ.