Кэбээйигэ тимирбит дьону көрдөөһүн күн-дьыл туругунан тохтоото

Бэҕэһээ, балаҕан ыйын 24 күнүгэр, СӨ Быыһыыр сулууспатын түөрт водолаһа Кэбээйи оройуонугар тимирбит балыксыттары көрдүү көппүтэ.

Балаҕан ыйын 18 күнүгэр Сангаар бөһүөлэгиттэн икки эр киһи мотуордаах оҥочонон балыктыы барбыт. Балаҕан ыйын 21 күнүгэр Кэбээйитээҕи ИДьМ дьуһуурунай чааһыгар дьон сүппүтүн туһунан иһитиннэрии киирбит.

Балаҕан ыйын 24 күнүгэр быыһааччылар быһылаан буолбут сиригэр тиийбиттэр. Таас Тумус диэн сир аттыгар өрүстэн илимҥэ туһаныллар дуоска быган сытарын көрбүттэр. Былаан быһыытынан бүгүн кинилэр оҥочону көрдүү барыахтаахтар эбит. Ол эрээри, күн-дьыл туруга мөлтөөн — күүстээх тыал түһэн, быыһааччылар төттөрү Дьокуускайга кэллилэр.