Кэбээйилэр Олоҥхо ыһыаҕар бэлэмнэнэллэр

Быйыл Олоҥхо ыһыаҕа от ыйын 4–5 күннэригэр Кэбээйи нэһилиэгэр ыытыллыаҕа. Бырааһынньыкка бэлэмнэнии номнуо саҕаланна: манна Саха сирин сүрүн архитектора Любовь Папок уонна «ЛЕТО» компетенция киинин салайааччыта Ирина Маркина кэлэн бардылар.

Эспиэрдэр уопсастыбаннай тутуулары, уулуссалары уонна тэрээһиннэр буолар сүрүн былаһааккаларын көрдүлэр, маны таһынан нэһилиэк уонна оройуон дьаһалталарын кытта инфраструктура салгыы сайдыытын дьүүллэстилэр.

Сири-уоту көрүү кэмигэр  эспиэрдэр хас да сүрүн кыһалҕаны бэлиэтээтилэр: эргэрбит биллэриилэр уонна вывескалар; уулусса сырдатыыта тиийбэт; сири-уоту киэргэтиигэ биир кэлим истиил суох; сорох сирдэр тас көстүүлэрэ мөлтөх.

Ыһыах кыттыылаахтарын уонна ыалдьыттарын көрсөргө нэһилиэги бэлэмнииргэ архитектордар кэккэ этиилэрин киллэрдилэр. Ол курдук, бырааһынньык үгэстэрин көрдөрөр биир кэлим истиили оҥоруу; өйдөнүмтүө ыйынньыктары туруоруу; угуйук конструкцияларын аныгы стандарт быһыытынан саҥардыы; уулуссалар уонна пааматынньыктар сырдатыыларын күүһүрдүү; эбии тупсарыы үлэлэрин ыытыы.

Маны таһынан исписэлиистэр 2023 сыллаахха «Тупсаҕай куорат эйгэтин тэрийии» бырагырааманан оҥоһуллубут уопсастыбаннай пааркаҕа уонна салгыы сайдыыга куоластааһыҥҥа кыттар сирдэргэ сырыттылар. Туспа нэһилиэк генеральнай былаанын олоххо киллэрии боппуруостара дьүүллэһилиннэ. Олоҥхо ыһыаҕар бэлэмнэнии сыл устата салҕаныаҕа. Тэрийээччилэр быйыл сайын кэбээйилэр саҥардыллыбыт уонна тупсарыллыбыт тутуулардаах көрсүөхтэрэ диэн эрэнэллэр.